MITIKANGKANG nga wala nay kinabuhi ang usa ka mag-uuma samtang samdan ang iyang kauban nga drayber human gipusil sa alas 3:45 sa hapon, niadtong Sabado, didto sa probinsiya sa Cotabato.

Si Joseph Semillano, hepe sa kapulisan sa Kabacan, nag-ila sa hingkabsan sa kinabuhi nga si Salim Dimalalaw, 46, minyo samtang ang samdan mao si si Allan Mulipas, 30, minyo, ug drayber sa pampasaherong multicab.

Gidugang ni Semillano nga nagtindog-tindog ang mga biktima duol sa Clutch and Bonding shop sa Rizal Avenue, Barangay Poblacion, Kabacan, dihang kalit lamang mibutho ang duha ka wala mga tawo ug gipamusil ang mga biktima gamit ang kalibre .45 nga pistola.

Dali sab nga miikyas ang mga mamumuno sakay sa usa ka motorsiklo paingon sa wala matino nga direksyon sa diha nga ilang nakit-an nga naligo na sa ilang kaugalingong dugo ang mga biktima.

Patay gilayon si Dimapalaw nga naigo sa iyang ulo samtang gidala sa Kabacan Medical Specialist Hospital si Mulipas nga anaa sa kritikal nga kahimtang tungod kay naka-angkon og samad pinusilan sa iyang tangkogo ug dughan.

Matud ni Daniel Edun, nga nagpaayo lamang si Mulipas sa iyang sakyanan sa shop ug wala sab niya mailhi ang mga suspetsado gumikan kay pulos sila naka-helmet.

Dako ang pagtuo sa kapulisan nga away sa druga ang motibo sa hitabo gumikan si Dimalalaw kanhi na nga nalambigit sa gidiling shabu ug posibling naangin lamang ang drayber. (Edgardo Fuerzas)