USA ka giingong bayot gipatay sa wala mailhing grupo sa alas 9:20 sa gabii, niadtong Sabado, didto sa probinsiya sa Cotabato.

Nailhan sa kapulisan ang biktima nga si Edward Halasan, 26, encoder sa Saint Peter funeral homes ug molupyo sa Barangay Poblacion 1, Midsayap.

Sigun sa taho gikan sa Cotabato Provincial Office nga sakay ang biktima sa iyang Zuzuki Rider aron unta mobisita sa iyang mga barkada sa Barangay Villarica.

Apan giatngan siya sa duha ka wala mailhing mga tawo ug sa walay pagpangutana gidunggab ang biktima gamit ang mahait nga kutsilyo. Wa pa matagbaw ang usa sa mga suspek gilaslas pa gyud ang liog sa biktima.

Dali sab nga misibat ang mga mamumuno dala ang motorsiklo sa biktima paingon ngadto sa wala matino nga direksyon.

Patay na nga nakit-an sa mga sibilyan si Halasan nga naligo sa iyang dugo kilid sa basakan sa Barangay Villarica, Midsayap.

Gibutyag ni Senior Inspector Elden Magbanua, hepe sa kapulisan sa Midsayap, nga pagpangawat sa motorsiklo ang nag-una nga motibo sa hitabo ug padayon pa silang nag-imbestiga sa kamatayon sa biktima. (Edgardo Fuerzas)