SI DAVAO City Police Office (DCPO) Director Rene Aspera naghangyo sa mga biktima sa kawat nga mopasaka gayud og kaso batok sa mga suspetsado ngadto sa korte.
Ang hangyo sa maong opisyal miguwa human wa gipadayon sa mga biktima ang pagpasaka og mga kaso batok sa mga suspek nga tulisan nga sila Carlo Jay Dancel Carcallas, 22, minyo, ug Renel Itang Carcallas, 20, pulos nagpuyo sa Inigo St. Bo. Obrero, siyudad sa Davao.
Mga suspetsado gibuhian niadtong Huwebes gikan sa selda sa San Pedro Police Station sanglit di na mopasaka og kaso ang ilang biktima nga si Paula Bianca Cosep Sabud, 23, registered nurse, ug nagpuyo sa Lubogan, Toril.
Mga suspetsado nasikop human natumba ang ilang gisakyan nga motorsiklo sanglit wa gibuhian sa biktima ang iyang bag nga gilabni sa mga kawatan didto sa dalang JP Laurel niadtong Oktubre 6.
"That was very dissapointing because nag-exert na nga yung mga police na mahuli yung mga suspect and then at the last day na pwedeng mag-file ng complaint against sa mga suspek she refused," ni Aspera dihang nahinabi sa mga tigbalita.
Si Aspera nagkanayon nga gikinahanglan nila ang tabang sa katawhan aron masulbad ang mga krimen nga nahitabo dinhi sa siyudad.
"Ito ang example kung bakit namin sinasabi na kami sa police can only do so much against crime fighting but without the cooperation of the public or the people in the communities eh di wala rin mangyayari. We have to release of the suspects because it's their right according to law," pahayag ni Aspera.
Tungod sa nahitabo, ang maong opisyal nagsulti nga ilang giawhag ang katawhan nga mopasaka gayud og kaso ngadto sa korte aron di makabuhi ang mga suspetsadong kawatan.
Sa laing bahin, gisusi karon sa kapulisan ang mga anggulo nganong gipatay si Rovic Maurillo, 25, ulitawo, tricycle driver ug nagpuyo sa 6th Avenue, Barangay Kapitan Tomas Monteverde, distrito sa Agdao, ning siyudad.
Si Maurillo gipusil patay sa alas 8:45 sa gabii niadtong Biyernes atubangan sa Kimberly Store, Mahogany Street, Hillside, Bajada, sigun sa imbestigasyon ni Police Officer 2 Zaldy Rom sa Sasa Police Station.
Giingon nga naglingkod lamang ang biktima sa iyang gimaneho nga traysikol sa maong lugar apan kalit miabot ang duha ka tawo nga nagsakay og Honda XRM nga motorsiklo.
Mga nakasaksi nagsulti nga usa sa angkas sa motorsiklo ang mikanaog ug way daghang pangutana gipusil ang biktima tumong sa iyang ulo ug likod nga miresulta sa iyang kamatayon.
Gilarawan ang mamumuno nga nagpangidaron og 30 anyos, 5'2" ang gitas-on, upaw, ug nagsul-ob og green nga jacket ug short pants, sigun sa mga nakasaksi sa maong hitabo.
Nahipus gikan sa crime scene ang duha ka basiyo sa .45 kalibre nga pistola nga maoy gigamit sa mga mamumuno kinsa daling mibiya sa nahitaboan sa krimen.
Dunay di pa kompirmadong taho nga posibleng gipatay ang biktima tungod kay dunay di maayong rekord.
Tungod niini, lawom nga imbestigasyon ang gihimo sa kapulisan aron masayran ang motibo, ug mailhan ang mga mamumuno. (JCZ/AD)