DUHA ka mga lalaki ang pulos gipangluba niadtong Sabado sa managlahing dapit ning siyudad sa Cagayan de Oro.

Unang biktima mao si Mike Roxas, 18, ulitawo, taga Upper Carmen ning siyudad.

Nahitabo ang insidente sa dalan Velez St., ning siyudad dihang kuyog kini sa mga higala aron mag-night cafe.

Apan laing grupo ang unang misita sa biktima ug gipasanginlan kining maoy nanukmag sa higala ra usab sa maong grupo.

Wala pa gani nakasulti ang biktima gitabangan na og kulata ug giluba gamit ang ice pick ang likod ug dughan sa biktima.

Dali sab dayon nga misibat ang mga suspek ug gipasagdan nga nagbuy-od ang biktima nga maoy naabtan sa mga higala niini.

Girespondehan sa mga polis sa Police Station 1 (PS1) sa Divisoria ang insidente ug gihatod ang biktima sa Northern Mindanao Medical Center (NMMC).

Padayon pa nga giila ang mga responsable sa pagpangluba.

Samtang laing lalaki ang nilanding sa susamang balay tambalanan human giluba sa wala mailing lalaki kagahapon mga alas 7:45 sa buntag sa Zone-5, Kauswagan ning siyudad.

Ang biktima nga mao si Arthur Dehig, 17, ulitawo, sa susamang dapit ang nakaangkon og duha ka mga samad sa bukton.

Nasayran gikan sa ginikanan sa biktima nga bag-o pa nakamata si Dehig dihang gihapitan sa wala mailing lalaki ug giluba.

Gibutyag usab sa biktima nga kung makita pag-usab ang suspetsado iyang maila kini labina pamilyar kayo ang hitsura. Ang Police Station 4 (PS4) sa Carmen niimbestigar na sa kaso ning panahona. (SVB)