PATAY ang usa ka lalaki human kalit nga nagpatunga sa dalan ug nabanggaan niadtong Sabado mga alas 11:10 sa gabii sa Barangay Matangad, lungsod sa Gitagum, Misamis Oriental.

Nailhan lamang sa mga higala ang pangalan sa biktima nga Arnel, ulitawo, sa susamang dapit.

Nasayran nga kuyog sa biktima ang iyang mga higala nga sila si Rodrigo Acedo, Romel Malyao, Pascual Cagubcob ug Laurito Catalina nga nag-inom sa usa ka tindahan sa dapit.

Dihang nakadesisyon sa pagpanguli nagkauyog ra usab sila sa pagpanguli ug nag-uban pagbaklay sa kalsada.

Nakurat pag-ayo ang iyang mga higala dihang kalit lang mipatunga sa kalsada si Arnel hinungdan nga wala na nakamenor ang usa ka Pajero nga nagdala og plaka CMT-731 nga gimaneho ni Val Corne.

Sa iyang bahin, ang driver nakurat ug wala na nakahigayon sa pagmenor dihang mipatunga sa dalan ang biktima hinungdan sa pagkasapon niini.

Nabunal ug dili mahitsura ang ulo sa biktima. Ang driver uban sa mga higala niini ang daling mitabang ug nidala sa biktima sa Northern Mindanao Medical Center (NMMC) ning siyudad sa Cagayan de Oro.

Apan dead on arrival nga gideklarar sa mga doctor si Arnel. Hinuon ang driver andam sa pagtabang sa galastuhon sa biktima apan boluntaryo gihapon kining mitahan sa Gitagum Police Station.

Ang mga kauban ug higala sa biktima nagduda nga gituyo sa biktima ang pagpaligis human giingong aduna kini gihambin nga problema. (Stephanie V. Berganio)