GRABENG selebrasyon sulod sa korte ang gihimo sa Cebu Eastern College (CEC) Dragons human nila nasakmit ang makasaysayon ug labing una nilang titulo kagahapon sa Cebu Schools Athletic Foundation Inc.(CESAFI) basketball touranment high school division sa Cebu Coliseum.

Ang Dragons, nga maoy kulatahunong team sa miaging tuig apan bangis nga nagpalig-on karong tuiga, ninglampornas pagbalik sa Sacred Heart School-Ateneo de Cebu (SHS-AdC) Magis Eagles, 91-81, sa Game 3 aron silhigon ang best-of-five championship series, 3-0.

“If not for the humiliation last year, we will not force to reinvent and try to find ways to put up this team,” matod sa negusyanteng si Chester Cokaliong, kinsa maoy nagpasiugda sa pagpalig-on sa Dragons ug usa ka alumna sa CEC.

Gipasabot ni Cokaliong nga isip usa ka alumna sa CEC, naapil gyud siya sa kauwaw dihang kanunay lang makmakon – dili yanong makmak kon dili linubnganay gyud og taga liog— ang Dragons sa miaging tuig hinungdan nga nihimo siya’g lakang aron molig-on ang puwersa sa Dragons.

Si coach Jerry Jaranilla, kinsa maoy gikuha ni Cokaliong aron mogiya sa ragons karong tuiga, nakasabot gyud kon unsa ka hidlaw ang CEC nga makuha ang titulo.

Usa sa mga opisyal sa tunghaan nga si Jefferson Go, kinsa kanunayng naa sa venue sa matag duwa sa Dragons, nagkanayon nga grabe gyud kaayo ang iyang kalipay sa nakuha nilang kalampusan.

Gikan sa sikit kaayo nga 1st half, ang Dragons mipasutoy sa ilang opensa sugod sa 3rd quarter sa pagpangulo nila ni Nike Montalvo ug Benjamin James Zosa aron iposte ang 58-47 nga labaw ug gikan niadto, wala na sila molingi pagbalik.

Nasulod sa Mythical Five mao sila si Montalvo ug Roy Villarias sa CEC, Adven Diputado ug Adrian Muller sa Magis Eagles ug Alvin Labolabo sa 4th placer University of Cebu (UC) Baby Webmasters.

Si Montalvo, kinsa nakaplagan sa CEC gikan sa Living Heritage Christian Academy sa Bacolod City, maoy napiling MVP.

Puntos kada usa - CEC (91)- Montalvo 23, Sumayang 23, Zosa 20, Regidor 12, Villarias 9, Bauya 2, Nuevos 2, SHS (81)- Bacaltos 23, Gabuya 15, Diputado 13, Muller 13, Ochea 4, Cadavis 2, Abbu 2, Saldo 2.