DAW nag garage sale ang Theft and Robbery Section sa Cebu City Police Office sa miaging semana human nga ilang gipresentar sa mga sakop sa media kadtong mga kinawat nga ilang na-recover sa hideout sa mga kawatan. Nagkadaiyang brand sa bag nga pangbabaye, cellphone.
relo, ATM og credit cards, ID og ubang mahalong butang ang ilang gilatag sa lamisa.
Ako nga nagtan-aw maong mga kinawat nag-imagine kong unsa ka guol sa mga tag-iya sa maong mga butang. Nakasiguro ko ang labaw nga ilang gikagul-an mao ang pagkahanaw sa sud sa maong mga bag. Nahibung ko nganong gitipigan pa sa mga kawatan ang mga bag.
Matod ni Sr. Insp. Boning Garciano nga ibaligya sab diay ni sa mga kanahan sa barato kaayo nga presyo. Siya nipuno nga gisiguro lang sa mga amaw ang cash og ang mga mahalon nga cellphone. Kining tanan nakuha sud sa mga mall og kan-anan pinaagi sa mga manimpohay.
PAGBANTAY
Kanang inyong gisigian og sipit nga bag, kinahanglan nga di gyud ninyo ibuwag bisan asa pa mo mahimutang. Bisan tua mo sa sud sa pansayan, o nagkaon sa mga restaurant sud sa mall. Kining mga manimpohay kasagaran sa mall man mo-operate. Timan-i ni, dunay mga spotter ni sila. Gikan sa spotter ipasa ni sa operator nga kasagaran mga minor de edad. Molampos gani ang operator ipasa ang bag ngadto sa runner og ang runner mopagawas sa bag gikan sa mall og ipasa na sab ni gitawag nga collector dayong hatod sa ilang gipasilongan o imbodohanan. Sa ato pa ikaw nga nangita sa imong bag lisod na kaayo ang pag-recover kutob na lang ka sa pagpa-blotter. Pananglit di gyud malikayan nga imong ibuwag ang bag gikan sa imong kamot o bukton samtang nagkaon, ayaw palingla o padala sa bisan unsa nga kasikas sa imong palibot. Sila ra gihapon ang nagmugna ana aron matugaw ka og di na maka concentrate og bantay sa imong bag.
ATM CARD
Sa sud gihapon sa mall naa sab diha kining mga high tech nga kawatan. Magdala na sila og camera. Adto ni sila mo-operate duol sa ATM machines. Ang modus mao ni, magpa picture konohay ang ilang batos. Ikaw nga nag-dispense og kuwarta ang background.
Sa imong pagtoo nag picture picture lang naa sa imong atubangan pero wa ka mahibalo nga ang imo diayng ATM card ang ilang gikuhaan og hulagway. Ang sunod na lang nimo nga nahibaw-an, nahanaw ang sud sa imong ATM paglabay sa pipila ka adlaw.
Ngano man? Tungod kay ilang gisuon ang imiong card sa high tech nga paagi. Mao nga sa sunod ayaw pagsugot nga naay magpa picture sa imong tungod samtang nagkuha ka og kuwarta gikan sa ATM machines.