ANG katungod alang sa pulitikanhong pagtuo gipanalipdan sa atong Batakang Balaod, mao nga girespeto ko ang mga anaa sa ‘wala.’ Mao nga padayon kong ikondena ang mga extrajducicial killing nga nibiktima sa daghan nga sama kanila.

Gani, ang ilang mga representante sa daghan nila nga partylist akong gidayeg sa daghang higayon hilabi na sa ilang pagbarog batok  sa pamunoan ni Gloria Arroyo.

Dihang usa ka kongresista nga pabor sa Chacha (charter change) ug dili gusto nga debate daw niratsada sa mga anti-chacha isip mga komunista, una kung nibarog ug nipahibawo sa tanan may labut sa kayabag sa maong pamasangil.

Kining maong kongresista namuhunan lang kay ang iyang partylist nabuhi man pinaagi sa kusokuso sa iyang gidudahan nga komunista o pagtawag sa tanan niyang kontra nga komunista. Wa mag-usik ug panahon aron himoon niyang tadtaran si Satur Ocampo ug Liza Maza.

Samtang duna koy mga pagsaway sa mga taga wala, di ko usab tugtan nga magmalampuson ang pagpakaaron-ingnon sa mga nitawag sa ilang kaugalingon nga nagmahal sa demokrasya apan hilabihan nga nakatila lapalapa ni Arroyo ug nitak-om sa isyu sa extrajudicial killing. Unsay kalainan niya nisalikway sa komunismo apan nigakos sa diktadorya ni Marcos? Kung mahal mo ang demokrasya, kayugtan mo ang mga kaaway niini, lakip na ang diktadorya ug korapsyon.       

Ang atong mga higala sa Wala mihatag ni PNoy ug hagbong nga grado, ang mga overacting  (OA) nga pipila nila, nihatag gyud og zero. Bisan pa tingali ug nidaug ang ilang gipaluyohan nga kandidato pagkapangu, dili gihapon nila hatagan ug pasado nga grado.

Ngano?

Kay ang sistema mismo ang wa nila tuohi, nga alang nila ang presidente instrumento lang ug gigapos sa maong sistema. Dili sila motuo nga dunay kausaban ubos sa kasamatangan nga sistema.

Gitahod ko ang ilang panahom, ang ako lang gikahibong nganong di man ni nila diretso nga angkunon sa publiko ang ilang gituohan.

Sila kadtong pundok nga hilabihan nga nisaway ni kanhi presidente Cory Aquino, apan mipakayab sa mga bandila sa ilang pundok sa adlaw nga gihatod na sa iyang pahulayanan ang boutang inahan ni PNoy. Tingali ilang nakita niadtong adlawa hain nga habig sa kasaysayan nagbarog ang minilyon nga katawhang Pilipinhon. Mao nga ilang gisakyan ang kahigayonan. Ambot kung gibati nila ang kabakikaw niadtong higayona.

Nahadlok ko nga wa na sila magbasa sa kasaysayan o sa mga sinyales sa panahon.

(birada_ruphil@yahoo.com)