NAG-UNANG trabaho sa mga kongresista ug senador mao ang pagpanday og mga balaud, di ang pagpatuman sa mga proyekto.

Apan nabali na kini karon tungod sa paghatag kanila og dagkong Priority Development Assistance Fund (PDAF) o komon nga gitawag og pork barrel fund.

Usa ka kongresista dunay pork barrel nga P70 milyunes samtang, ang kada senador dunay P200 milyunes, matag tuig.

Ang depensa sa mga kongresista sa pagdawat sa PDAF alang sa paghatag og igong serbisyon sa ilang distrito pinaagi sa daghang proyekto.

Tinuod, dunay proyekto nga gipatuman sa mga kongresista apan kadaghanan sentro usab sa daghang kwestiyon sa pagpangurakot.

Ang PDAF gituhoan nga dakong rason nga daghan nang buot magkongresista bisan kadtong way igong kapasidad ug kabangkaagan sa pag-umol og balaud, napiling kongresisa tungod sa gahom sa kuwarta.

Gibutyag sa usa ka taho nga dunay lakang ang mga kongresista sa pagdoble sa ilang PDAF ngadto sa P145 milyunes.

Di kini tiaw kon matuman tungod sa gatosan ka mga kongresista lakip sa mga partylist representative.

Ug si House Speaker Sonny Belmonte gikutlo sa taho bahin sa lakang nga pagpaumento sa budget sa Kongresisto.

Si Kong. Eddie Gullas sa Unang Distrito sa Sugbo nagkanayon nga 111 ka mga kongresista sa Kabisay-an ug Mindanao nagduso sa P2 bilyunes nga budget sa Ubos Balay-Balauranan sa 2011.

Di kaha mas mosamot lang kalawom ang bulsa sa mga kongresista niini?