NAG-ATUBANG og kasong kreminal ang usa ka molupyo sa Minglanilla, Sugbo nga giingong hubog human iyang giyab-ag usa ka baldeng tubig ang usa ka tuig nga bata samtang natug.

Giingong diriyot makabsi sa kinabuhi ang biktima kay ang tubig nisud sa iyang ilong ug baba apan nasalbar siya sa iyang inahan.

Si Alioser Orjaleza, 44, molupyo sa Sitio Kalubihan, Calajoan, Minglanilla, gipasakahan sa kasong slight physical injuries dihang giyab-an niyag tubig ang natug nga si Paul Kent Cartalaba, usa ka tuig ug duha ka buwan, niadtong Oktubre 4.

Nirekomendar ang Cebu Provincial Prosecutor’s Office nga mopiyansa si Orjaleza sa kantidad nga P2,000 alang sa iyang temporaryong kagawasan samtang husayon ning iyang kaso sa korte.

Matod ni Mary Anne Cartalaba, inahan sa bata, niadtong hapon sa Oktubre 4 gidala niya ang iyang anak sa estambayan nga ginama sa kawayan nga duol ra sa ilang balay aron mopahuway. 

Dihang diha na sila sa estambayan nakatug ang bata unya naabot ang ilan silingan nga si Orjaleza nga nakainom ug nimando kanila nga mobiya sa dapit apan wa niya panumbalinga.

Kay wa niya tagda ang suspek nasuko kini ug giingnan siya nga mokuhag siyag usa ka baldeng tubig unya bubuan sila niini.

Gitinuod gyud ni Orjaleza ang iyang bahad dihang gibubuan niyag tubig ang iyang anak ug napunta ang daghang ngadto sa iyang ilong ug baba.

Nakit-an niyang naglisod sa paginhawa ang iyang anak busa gidali niyag kuha ang mga tubig diha sa ilong niini.

Subay niini, niadto siya sa Minglanilla police station aron ireklamo ang insidente ug nirespondi gilayon ang kapulisan nga niresulta sa pagkasikop ni Orjaleza ug gipasakaan og reklamo.