ANG Commission on Elections (Coemelc) sa probinsiya sa Davao del Sur nagbutyag nga nadugangan ang mga clustered precincts ug ang mga botante sa Davao del Sur.
Si Atty. Maria Febes Barlaan, provincial election supervisor, nagkanayon sa Superbalita pinaagi sa telepono, nga gikan sa 720 ka mga clustered precincts niadtong national ug local elections sa Mayo, ilang gidugangan ngadto sa 1,618 sa 337 ka mga barangay sa Davao del Sur.
"Iba kasi noon kasi PCOS (Precinct Count Optical Scan) machine tayo pero ngayon balik tayo sa mano-mano so kailangan natin magdagdag nga mga precincts," sumala ni Barlaan.
Gipahayag sab sa Comelec nga nisaka ang ihap sa mga registered voters sa probinsya ngadto sa kapin 3 mil.
Subay sa rekord sa Comelec gikan sa 515,000 niadtong Mayo, anaa na karon sa 518,241 ang mga rehistradong botante.
Pahinumdom
Matod ni Barlaan, angayang sundon gyud sa mga pulitiko ang reglamento sa Comelec aron di mag-atubang og diskwaliplikasyon.
"We remind them na P3 lang per voters ang gagastusin at sa mga posters and handbills may measurement pa rin tayo," matud niya.
Anaa sa 3 by 11 lang ang gidak-on sa matag handbills ug 8 by 6 sab alang sa mga streamers ang gamiton sa matag pulitiko. Di sab basta makapapilit sa ilang mga campaign materials ang mga pulitiko, pasabot sa Comelec.
"Well pag-start ng campaign period ngayong October 14, mag-start din ang Comelec sa aming trabaho at tulad ng dati may operation baklas tayo kaya para di masayang ang kanilang gastusin dapat sumunod sila sa rules," pahayag ni Barlaan. (Dondon Dinoy)