SUSPEK sa pagpatay sa mamahayag nga si Nestor Bedolido niadtong buwan sa Hunyo naglambigit karon kang Davao del Sur Governor Douglas Cagas ug usa ka mayor sa lungsod isip maoy utok sa pagpatay.

Sa affidavit nga gilagdaan niadtong Biyernes ni Voltaire Mirafuentes, 27, atubangan mismo ni state prosecutor Hazel Valdez sa Camp Crame, gitug-an niya nga si Cagas ug Matanao Mayor Butch Fernandez maoy nagsugo nga patyon si Bedolido.

Si Mirafuentes kinsa gitudlong nagpatay, nagkanayon nga gipatuo siya nila ni Cagas ug Fernandez nga adunay kalabutan si Bedolido sa kamatayon sa iyang ginikanan niadtong tuig 2009.

Gipirmahan ni Mirafuentes ang pahayag didto sa buhatan sa Criminal Investigation and Detection Group (CIDG) sa Camp Crame sa Quezon City niadtong Oktubre 8.

Sa pakighinabi sa media, gilayong gilimod ni Cagas ang pasangil ug nitataw nga wa siya makaila o makatagbo sa suspek.

Dugang gikanayon ni Mirafuentes sa iyang affidavit nga gipatawag siya ni Cagas sa balay niini didto sa siyudad sa Digos, buntag niadtong Hunyo 19.

Sa iyang pag-abot sa balay, iyang nakit-an si Mayor Fernandez kuyog ang gobernador.

Ang duha ka mga politiko nagsulti kaniya nga si Bedolido adunay kalabutan sa kamatayon sa iyang ginikanan human gipusil sa mga suspek nga mao sila si Apolinario "Jun" Gamayot Jr. ug Elizardo "Doydoy" Bacon.

Sila si Gamayot ug Bacon, nailhang mga bodyguards ni Fernandez giingong gipalagpot sa mayor human nasakpan nga "deep penetration agents" sa political rival ni Cagas nga mao ang Bautista sa Malita.

Matod ni Mirafuentes nga ang iyang ginikanan, Henry ug Brenda, kanhi nagtrabaho kang Cagas isip "miyembro sa iyang confidential close-in staff." Sila namatay sa ambus didto sa New Visayas, lungsod sa Matanao niadtong Septyembre 9, 2009.

Si Bedolido maoy kanhi editor sa Digos Times, gipanag-iyahan sa pamilyang Cagas.

Nipahawa kini kang Cagas human adunay dyutay'ng bikil ug nibalhin pag-trabaho kang kanhi Representative Claude Bautista samtang nahimong consultant sa sinemanang tabloid nga Kastigador.

Pipila ka semana human napildi ni Cagas si Bautista pagka-gobernador, gipusil si Bedolido sa kanto sa dalang Quezon ug Rizal Avenue sa maong siyudad.

Si Mirafuentes nasikop sa dakbayan human gilusad sa kapulisan ang hot pursuit operation ug gilayong gibalhin ang pag-kostudiya didto sa Camp Crame.

Gitataw pa niini, nga ang kalibre .45 nga pistola nga gigamit pagpusil ni Bedolido gikan mismo kang Cagas.

Pagka-gabii niadtong Hunyo 19, si Mirafuentes niingon nga iyang gipusil patay si Bedolido duol sa Torecs Videoke Bar didto sa dalang Quezon Avenue sa siyudad.

Gisaysay niya nga siya gitabangan sa iyang igsuon nga si Henry ug laing duha nga nailhan lang sa alyas nga Bado ug Ali.

Nakurat na lamang si Mirafuentes nianang pagka-ugma nga nikatap na ang mga cartographic sketch sa siyudad nga susama sa iyang dagway ug sa dihang nigawas sa telebisyon, nitago na siya.

Si Cagas nagkuwestiyon sab kon nganong dugay nigawas si Mirafuentes aron mosulti niini ngadto sa mga otoridad.

Subling gikuha sa Superbalita ang bahin ni Cagas kagahapon sa buntag, ug siya mitubag pinaagi sa text message, "Wala pa ko kadawat sa affidavit ug summons."

Nasayran sab nga laing extrajudicial statement didto sa CIDG-Camp Crame ang giluwatan ni Mirafuentes niadtong Oktubre 6 ug nagkanayon nga andam siyang magpailawom sa Witness Protection Program sa Department of Justice. (Orlando B. Dinoy)