MGA negusiyante ug mga molupyo nagsugyot karon nga subling pagpailawom sa martial law ang siyudad sa Cotabato.

Usa niadtong lider sa simbahan nga mipabor sa sugyot mao si Cotabato Auxiliary Bishop Jose Colin Bagaforo.

Ang pagsugyot nga ibutang na usab ubos sa martial law ang dakbayan nahimo tungod sa sunod-sunod nga mga dagkong hitabo sa dakbayan sama sa pagpamomba, pagpamanhig, tulis ug pagpamusil ug ang ulahi mao ang pagdagit sa negusiyanteng Tsinoy nga si Conchieta Atienza Tan.

Matud ni Bagaforo nga demoralisado na ang katawhan ilabi na kadtong mga negusiyante nga gibati og sobrang kahadlok sa ilang seguridad sa hulga nga pagpangidnap basin sila na unya ang isunod nga dagiton.

Gibutyag ni Yu Bing Chua, nangulo sa mga negusiyanteng Tsinoy sa Cotabato, nga kon walay mahimo ang lokal nga kagamhanan sa maong problema, mapugos sila sa pagpanirado sa ilang negusyo ug mobalhin ngadto sa laing lugar.

Gihangyo sab ni Chua si Pangulong Benigno Aquino III nga ibalik ang puwersa sa Philippine Marines sa siyudad ug mohimo'g paspas nga lakang batok sa organisadong mga kidnaper sa Central Mindanao. (Edgardo Fuerzas)