USA ka sakop sa Civilian Armed Forces Geographical Unit (Cafgu) gipusil sa wa mailhing suspek didto sa dalang Aguho, Barangay Poblacion, lungsod sa Maragusan, Compostela Valley (Comval) province, Sabado sa gabii.
Nailhan ang biktima nga mao si Arnel Canillo, hamtung ang panuigon, usa ka sakop sa Cafgu ilawom sa 72nd Infantry Battalion sa Philippine Army, ug molupyo sa Barangay Lahi, lungsod sa Maragusan.
Sa report gikan sa Comval Province Police Provincial Office nasayran nga pasado alas 11:45 sa gabii nagtindog lamang ang biktima atubangan sa Keaans Eatery didto sa dakang Aguho, dihang kalit nga miabot ang usa ka wa mailhing lalaking sakay sa motorsiklo ug sa way paglangan gipusil ang biktima gamit ang kalibre .45 nga pistola sa makadaghang higayon.
Naigo ang biktima sa iyang tiyan ug tiil hinungdan nga dali siyang gidala sa Maragusan Municipal Hospital.
Apan tungod sa grabing samad nga nahiaguman sa biktima, gibalhin siya sa Davao Regional Hospital sa siyudad sa Tagum.
Ang suspek abtik dayon nga misibat padulong sa wa matino nga lugar human sa pagpamusil.
Kapulisan sa lungsod sa Maragusan gilayong mihimo og imbestigasyon sa maong hitabo.
Dugang pakisusi ang gilusad sa mga otoridad aron sayron kung may kalabutan sa trabaho sa biktima ang motibo sa pagpamusil. (Marvin Pineda)