USA ka ulitawo nadala sa ospital human nabanggaan sa usa ka depasaherong bus didto sa National Highway, Sityo Gabanan, Barangay Baylo, lungsod sa Monkayo, Compostela Valley (Comval) province, Sabado sa gabii.

Nailhan ang biktima nga mao si Kent Bantog, 20, ug molupyo sa Barangay San Jose, lungsod sa Monkayo.

Sa report gikan sa Comval Province Police Provincial Office nasayran nga pasado alas 9:00 sa gabii mitabok sa dalan ang biktima, nabanggaan siya sa naghaguros nga Bachelor Bus nga nagbatun sa plaka numero LWU-559 ug gidrayban sa usa ka Renante Tac-an, ug molupyo sa Barangay Bliss, lungsod sa Monkayo.

Ang bus nagdagan gikan sa siyudad sa Davao padulong sa siyudad sa Butuan.

Pag-abot sa maong dapit aksidente niining nabanggaan ang biktima nga mitabok sa dalan.

Nahiagum og mga pangos ug bun-og sa kalawasan ang biktima ug daling gidala sa Comval District Hospital sa lungsod sa Montevista.

Samtang ang drayber sa bus mitahan sa iyang kaugalingon ngadto sa mga otoridad, gikostudiya sab sa kapulisan ang bus nga nalambigit sa aksidente. (Marvin Pineda)