MOSUWAY pagkulit og kasaysayan ang University of Cebu (UC) Webmasters sa ilang pagpakigbatok og balik sa 9-time champion University of the Visayas (UV) Green Lancers karong hapon sa Game 4 sa championship series sa Cebu Schools Athletic Foundation Inc. (CESAFI) college division sa Cebu Coliseum.

Dala ang 2-1 nga bintaha sa best-of-five series, ang Webmasters ni coach Rhoel Gomez magtinguha nga maoy labing unang team nga makailog sa korona sa dominanteng Green Lancers.

Sa miaging gabii sa Game 3, gipanglampornas sa Webmasters ang Green Lancers, 81-61, nga seguradong nakadugang sa ilang kadasig sa pagsakmit sa labing una nilang titulo sa liga.

Apan bisan pa sa maong dakong kadaugan, gitataw ni Gomez nga dili gyud sayon alang kanila ang pag-ilog sa korona sa Green Lancers ug kinahanglan gyud silang mobanat og maayo.

“Dili gyud ta makaseguro kay naa man gud nay tradisyon ang UV, naa sila’y materyales. Hopefully ato nang makuha sa ugma (karong adlawa) para wala na’y duwa sa Huwebes,” matod ni Gomez.

Hinuon asoy ni Gomez nga kon dili gihapon makakita’g paagi ang Green Lancers sa pagpugong sa iyang higante nga si 6’10” Junmar Fajardo, hayan dakodako gyud ang ilang poruhan nga makuha na ang kampiyunato.

“Kon dili nila mapugngan ang akong big man, basin ato nang makuha. Si Abay (angga ni Fajardo) mao man gyud ang ilang problema kay naa na gyud ang maturity ni Abay,” pasabot ni Gomez.

“Niabot na sab gyud ang maturity sa akong wingmen kay maka-fight na man gyud sila sa UV. Sana makuha na namo.”

Sa iyang bahin, si UV coach Elmer Cabahug miangkon nga dako gyud kaayo niyang problema ang presensya ni Fajardo sa ilawom hilabi na kon mangigo pa gyud ang mga tirador sa gawas sa Webmasters.

“Kon mo-click ang ilang outside shooting unya naa si Fajardo sa inside, lisod gyud. Homecourt man sab gyud na nila, manira gyud na ang ilang outside shooters,” batbat ni Cabahug.

“Given na man gyud nang lisod pugngan si Fajardo so we just hope nga dili mo-click ang ilang outside shooting kay lisod na kaayo kon magdungan og click ang ilang outside ug inside.”

Nidugang si Cabahug nga naglaom pa gyud siya makapugos og deciding game ug kinahanglan lang gyung mokayod pa’g maayo ang iyang mga batos.

“Ang championship is always 50-50. It’s a matter of kon kinsa gyud ang mas nagkinahanglan. So far, atong nakita nga mas hunger gyud ang UC, mas aggressive sila.

They’re really hitting for the title,” pasabot ni Cabahug.

Gipasabot ni Cabahug nga iyaha gyung giawhag ang iyang ginsakupan nga ipagawas gyud ang tanang makaya niini aron maprotektahan nila ang dugay na nilang gingharian.