GIBALIWA. Nagpakabuta-bungol si Gob. Gwen Garcia sa suwat ni P-Noy nga si Engr. Paul Villarete ang iyang gusto ipuli ni Mactan-Cebu international airport manager Danilo Augusto B. Francia.

Klaro kaayo nga ang panag-away nilang ni Gov. Garcia ug ni kaniadto mayor nga karon Kong. Tomas Osmeña dut sa bukog. Di usab malalis nga si Villarete tawo ni Kongresista Tomas ug tungod niini gibaliwa ni Gobernador Garcia ang suwat ni P-Noy.

Gani atong nahibaw-an sa miaging semana nga si Garcia ug ang MCIAA Board magpanday og giingon nga lagda sa kwalipikasyon sa mahimong general manager as Mactan-Cebu airport.

Nagpasabot ba kini nga buhatan sa MCIAA Board og lagda nga mahimong dili kwalipikado si Villarete nga matudlong general manager sa airport? Ang termino ni Francia hangtod pa hinuon sa sunod buwan.

Ang wa pagpanumbaling sa suwat ni P-Noy ngadto sa MCIAA Board nga si Villarete ang iyang gustong ihulip ni Francia, gipakita ni Gov. Garcia ang iyang gilas ug nga duna siyay poder dinhis Sugbo ug sa MCIAA Board.

Sa laing bahin, ato sad nga matan-aw nga usa ka huyang nga presidente si Noy Aquino tungod kay mahimo ra man nga dili hatagan og pagtagad ang iyang suwat ngadto sa MCIAA Board.

Gani bisan pa sa hugot nga pagsuporta ni DOTC Usec. Totol Batuhan nga si

Villarete maoy puli ni Francia, si Gobernador Garcia ug ang mga miyembro sa MCIAA board wa gihapon hatagig pagtagad ang suwat ni P-Noy.

Ang mga bag-ong miyembrong civilian sa MCIAA Board mga tinudlo ni P-Noy. Apan wa pa ko makadungog mga mitingog sila aron pagsuporta o depensa sa suwat ni P-Noy nga nagtudlo ni Villarete nga puli unya ni Francia.

Kon maghisgot ta kon si P-Noy usa ka lig-on ug dunay agi sa iyang unang 100 ka adlaw nga presidente, ang iyang magtutudlo kaniadto sa Ateneo de Manila nga si Prof. Pablo Manalastas wa mahimuot.

Kon si Manalastas ang mohatag og grado (di sama sa Malacañang nga naghatag og ilang kaugalingong siento porsento nga pasado si P-Noy) si P-Noy igo lang nakapasar sama sa iyang grado sa Math sa Ateneo kaniadto nga C+.

Bisan pa sa diskurso ni P-Noy nga mibalik ang pagsalig sa mga imbestor sa atong nasod ug dunay $2 bilyunes nga ibubo nga investment dinhis atong nasud nga makahatag og 43,600 nga trabaho, si Manalastas miingon nga wa pay dakong nahitabo nga iyang nakita sa 100 ka adlaw ni P-Noy.

Gani, matod pa ni Manalastas, si P-Noy nahagbong sa hostage crisis diin ang 8 ka hostages nga taga Hong Kong nangamatay sa kamot ni hostage-taker Rolando Mendoza. Tungod niini gisaway og maayo sa Tsina ang kagamhanan ni P-Noy.

****

TRABAHO. Si Bokal Arleigh Sitoy, ang naginusarang LP sa provincial board nahimong kontrobersyal tungod kay si Gobernador Garcia misaway sa iya untang pandayon nga balaodnon nga ang pakite o putos sa chicharon kinahanglan butangan og marka sa gitawag nga nutritional value.

Si Sitoy nagtrabaho lang ngan nga magbabalaod sa probinsya. Imbis nga sawayon ni gobernadora ang maayong intensyon ni Sitoy iya lang unta nga gipasaka sa provincial board aron mahibaw-an kon maayo ba kini sa namuhat sa chicharon.

Mora na hinuon sila og mga bata. Si Gobernador Gwen nagpahulgway sa prensa nga nagkitkit og chicharon (ambot og iya ba tong gilamoy) nga morag iyang gipalaway si Sitoy nga di na mokaon kay highblood.

Si Bokal Sitoy wa magpataka. Kay basi sa atong gitawag nga “disclosure” ang tanang klase sa baligyang makaon o dili dunay marka aron ang mopalit makahibawo sa ilang gipalit labina sa pagkaon. Sa nakahibawo, morag ignorante na hinuon si gobernador sa maong isyu.

(elespinoza53@yahoo.com)