WALA pa gani magsugod ang kampanya alang sa barangay ug Saangguniang Kabataan (SK) elections pero ato nang ma-obserbahan ang kisaw sa kampanya. Mora nag campaign period na diin ang kadaghanan nagpahigayon og pulong-pulong, nanglamano ug nagbutang na og mga posters. Iyahay lang. Aw, kining eleksiyon sa maka-una lang.

Subo lang pod palandungon nga walay nahimo ang Commission on Elections (Comelec) sa pagbadlong sa mga malapason. Kini gud pong Comelec dili mohimo og lakang kon walay reklamo o petisyon nga mo-abot kanila. Aw, mahulog na ning free for all. Aduna koy nahibaw-an nga ang ubang mokandidato pagkakapitan, nag-andam og dako-dakong budget.

Duna gud kunoy nag-andam ug dos milyones ka pesos. Ingon ana na diay ka dako ang magasto sa molansar. Unsa-on man na nila pagbawi?

POSTER AREAS

Gi-designate sa Comelec ang mga barangay hall ug mga sports complex nga common poster areas. Ambot lang. Morag imposible kining mahitabo. Motugot kaha ang mga incumbent barangay captains nga mobutang ang ilang kontra ug mga poster o campaign material sa barangay hall ug sports complex?

Ang mga barangay kapitan maoy hari diha sa ilang barangay. Siguro motugot sa pagbutang apan laksi-on ra gihapon inig hawa.  Nahibawo naman mo nga init usab kaayo ang eleksiyon sa barangay. Ang mga incumbent gani migamit man sa mga resources sa barangay sama sa mga sakyanan alang sa ilang pagpangampaniya. Bentahoso kaayo nang uban.

PAPEL SA KAPITAN

Dako na kaayo ug papel ang kapitan sa barangay karon. Sila nay tig-implementar sa mga proyekto. Maoy hinungdan ang uban kusog na kaayong manguwarta. Kaniadto ang papel sa kapitan murog peacemaker o tighusay ra gyod kon dunay magkalalis nga mga lomolopyo.

Akong uyu-an kapitan sa una didto sa amo. Inig dunay mag-away ug iyang husayon, iyang manduan ang isig ka habig nga magdala gyod og manok. Unya iyang ihawon, dayon saw-an sa mga nag-away. Mao hinungdan nga magka-uliay dayon. Daghan na kaayong siyang gihusay ug gipadala og manok. Hangtod mi-abot ang adlaw nga wala nay nag-away ug magpahusay niya. Iyang gisuta kon unsay hinungdan nganong wala nay nag-away. Sus, iyang nahibaw-an nga nahurot naman diay ang mga manok sa iyang barangay. He, he.

(bgnalzaro@gmanetwork.com)