NITUMAW ang taho nga adunay pagahimuong massive walkout ang mga doktor sa Cebu City Medical Center (CCMC).
Ang hungihong nagagumikan sa daghan nga mga problema nga wa maatiman sa management sa tambalanan.
Gialegar usab nga ang mga department head sa maong tambalanan nipirma og manifesto aron sa pagtagad sa ilang mga problema.
Pipila sa mga rason nga gipaabot sa mga doctor nga duha nila ka mga kauban wa makadawat sa ilang suhulan.
Wa sab sila hatagi og hazard pay, problema kabahin sa Philhealth check ug wa sab silay share sa affiliation fee sa mga student nurse nga mag-practice diha sa CCMC.
Si Dr. Myrna Go, hepe sa CCMC, nipasabot nga wala masuhuli ang doctor gikan sa Enero sanglit nagkasabot man sila nga i-accredit lang ang iyang pagtrabaho sa iyang experience.
Gisaysay ni Go nga ang laing doctor naapil sa election ban hinungdan nga wa makadawat sa iyang sweldo sulod sa tulo ka mga buwan gikan sa Abril ngadto sa Hunyo.
Gidugang sa hepe sa CCMC nga daghan gyud ang mga doctor sa CCMC, apil na siya, nga wa makadawat og hazard pay sanglit ang mga doctor raman gikan sa laboratory ug X-ray department ang gihatagan sa benepisyo. (PAC)