NAPIKAS ug nabuwag ang ulo gikan sa lawas sa usa ka inahan.
Di pa gyud igo, gidauban pa siya sa iyang anak nga may deperensya sa pangisip human siya giatsa sa pagpatay kagahapon sa kaadlawon sa Sitio San Roque, Brgy. Don Pedro, dakbayan sa Bogo.
Ang lawas ni Victoria Moraca, 55, mag-uuma, napaig na nga naabtan sa kapulisan ug mga bombero sa dakbayan sa Bogo kay gidauban sulod sa gamay nga balay.
Sa wa pa siya daubi, gibugha pa ang iyang ulo ug ubang parte sa iyang lawas sa iyang anak nga si Rolando Moraca, 26, ginamit ang atsa.
Si Rolando giingong nalisoan sa pangisip sud na sa duha ka mga tuig.
Si SPO3 Allan Dosdos, chief investigator sa kapulisan sa dakbayan sa Bogo nga nahinabi
sa Sun. Star.Superbalita, nagkanayon nga sa wa pa mahitabo ang krimin niadtong Dominggo sa gabii,si Rolando nagsige og baid sa sundang nga nagpangita sa iyang amahan nga si Clemente, 55, mag-uuma, kay iyang patyon.
Matod pa ni Dosdos nga si Clemente nitug-an kaniya nga niandar na usab ang sakit sa iyang anak niadtong Domingo sa gabii.
Siya gipahibawo sa iyang asawa nga si Victoria nga molikay kay nangita si Rolando kay patyon siya sanglit nagdumot niya ang iyang anak.
Nagkasabot ang managtiayon nga human sa ilang panihapon alas 7:00 sa gabii, si Clemente mobiya ug adto lang una matulog sa balay sa ilang silingan ug moapas lang si Victoria.
Nisamot og kalagot ang suspek sanglit sa punay niyag pangita ug pinaabot sa iyang amahan wa gyud kini niya makit-i.
Nikuha kinig sundang nga nagsigig baid ug nipadayag nga patyon niya ang iyahang amahan.
Apan pagka-alas 2:00 kagahapon sa kaadlawon naukay na lang ang mga silingan sa pamilyang Moraca, dihang dunay nabati nga dunay nangayog pakitabang.
Sa ilang pagusi sa balay, giingong gitadtad sa suspek anak ang iyang inahan ginamit ang atsa sa makadaghang mga higayon.
Way nakatabang ug nisuway sa pagduol nga mga silingan gumikan sa kahadlok nga sila usab ang atakihon tungod kay dunay may sakit sa pangisip ang suspek.
Human mapikas ang ulo sa biktima nga nabuwag sa lawas niini, si Rolando niguroy niini ngadto sa lain nilang gamay nga balay nga ginama sa light materials ug gidauban hinungdan nga napaig ang lawas ug ulo.
Dihang ningrespondi ang mga pulis ug bombero sa crime scene, naabtan niini ang suspek nga naglingkod sa gawas sa balay nga nagparok-parok sa iyang ulo sa gidala niining atsa.
Nisuway unta kinig hamag sa mga pulis apan dihang gipabuthan og warning shot wa na kini mosukol hinungdan nga gidakop ug na-imbargo ang gidalang atsa.
Si Dosdos niingon nga dihang iyang giimbestigar si Rolando kon nakahibawo ba siya sa iyang pagpatay sa iyang inahan, igo lang kining nipadayag nga “ Monyika man to”.
“Grabi ka brutal nga krimin kay human mapikas ang ulo ug nabuwag ang lawas, ang utok nagpasad diha sa tugkaran sa ilang balay. Gihipos pa man ni Rolando dayon gidala didto sa payag gidauban,” dugang ni Dosdos.
Pag-abot sa mga pulis ug bombero, napaig na ang tibuok lawas sa biktima hinungdan nga gamay lang kaayo.
Ang amahan nitug-an nga duha na ka tuig nga nag-antos sa sakit sa pangisip ang iyang anak ug wa gyud kini mapatambali tungod usab sa pagkagahi niinig ulo.
Gani sa panahon nga motukar ang sakit niini, way laing puntarya kon di patyon niya ang iyang amahan.
Kagahapon sa buntag niduaw ang amahan didto sa bilanggo-an sa Bogo police station.
Apan dihang ang suspek nakakita sa iyang amahan, nag-wild siya nga siga kaayo ang mata nga gipangbunlot ang mga puthaw sa silda.
Kasong parricide ingon man arson ang giandam sa kapulisan sa dakbayan sa Bogo batok kang Rolando nga ipasaka ugmang adlawa.
Matod ni Dosdos nga anaa na sa korte ang pagdeterminar sa isyu sa pangisip sa suspek, kon tinuod ba gyud kining buang dihang gihimo ang krimen.