PATAY ang usa ka barangay kapitan human girakrakan niadtong Domingo mga alas 4:30 sa hapon sa Barangay Tumaras lungsod sa Kibawe, Bukidnon.

Ang biktima mao si Barangay Tumaras kapitan Manuel Fajardo kinsa usa usab ka sakop sa Civilian Auxiliary Forces and Geographical Unit (Cafgu).

Sa pakighinabi sa Sun.Star Superbalita ngadto kang Major Noli P. Kanashiro kinsa tigpamaba sa 4th Infantry Division (4ID) sa Philippine Army ning siyudad sa Cagayan de Oro niingon nga nahitabo ang pagpangluthang mga alas 4:30 sa hapon atol sa gipahigayon nga pulong-pulong sa dapit nga gitambongan sa mayor sa Kibawe.

Sumala sa taho nga kalit lang miabot ang lima ka mga wala mailang mga lalaki ug nisinggit nga si Fajardo lamang ang ilang tuyo.

Gipusil ang biktima ug dihang nagbuy-od na girakrakan pag-usab aron pagsiguro nga makabsan gyud kini sa kinabuhi. Armado ang mga suspetsado og M16 rifle ug kalibre .45.

Yano lamang kaayong nanglakaw ang mga suspetsado ug nitabok pa sa tulay nga bahin sa dapit human sa hitabo. Samtang walay nisuway pagukod niini labina nga kini mga armado.

Gibutyag nga usa sa mga suspetsado nagpaila nga sakop sa New People's Army (NPA).

Matud ni Kanashiro nga bisan remote area ang lugar nga nahimutangan ni Fajardo apan malinawon kini gani ang mayor nga nibisita wala na nagdala og bodyguard niadtong tungora ug nakurat na lamang kini pag-ayo sa pagkadungog sa kusog nga buto.

Nagtuo ang mga sundalo nga ang maong mga suspek sakop sa Guerella Front 53 Southeastern Regional Committee nga nakabase sa siyudad sa Davao.

Usa sa motibo sa nakita sa inisyal nga imbestigasyon mao ang pagka estrikto sa biktima labina sa mga armadong mga tawo. Giingong dili kini mosugot nga adunay makasulod sa iyang lugar nga mga NPA.

Dugang ni Kanashiro nga padayon pa ang ilang gihimong imbestigasyon sa hitabo uban sab sa imbestigasyon sa Kibawe Police Station.

Padayon usab nga gisuta kung magpapili ba pag-usab ang biktima sa eleksiyon. (Stephanie V. Berganio)