DUHA ka mga armadong grupo subling nagbakbakay alas 5:00 sa gabii niadtong Lunes didto sa probinsiya sa Cotabato.
Sa nahagpat nga taho gikan sa 602nd Brigade sa Philippine Army, nag-abot na usab ang grupo ni Kumander Dema Ambil sa Moro National Liberation Front (MNLF) ug mga armadong tribong Manobo sa Barangay Nangaan, Kabacan nga maoy hinungdan sa 20 minutos nga pinusilay.
Gumikan sa hitabo, nagkatibulaag ang mga sibilyan sa pagpanagan paingon sa mga luwas nga dapit sa kahadlok nga maangin sa engkwentro.
Nahunong lamang ang pinusilay sa mga armado sa diha nga nahiabot ang puwersa sa militar ug kapulisan uban ang mga lokal nga opisyal.
Gibutyag ni Kabacan Mayor George Tan nga dugay na niya nga naresulba ang bingkil sa yuta sa magka-away nga grupo apan subli na sab silang nagka-engkwentro.
Nagpaabot na og hinabang si Cotabato Governor Emmylou Talinio Mendoza sa mga sibilyan nga naapektuhan sa kagubot samtang gitakda niya nga hinabi-on ang magka-away nga grupo alang sa kalinaw sa naasoy nga dapit. (Edgardo Fuerzas)