ANG Commission on Election (Comelec) naglaum nga modaghan pa ang MGA kandidato nga mokandidato sa katapusang adlaw sa pagpasang-at sa Certificate of Candidacy (CoC) sa Davao del Sur.

Sa uwahing datos nga gipagula sa Comelec niadtong Lunes, 478 ang kandidato pagka-barangay kapitan ug 4,125 sa pagka-barangay kagawad ang nipasang-at sa ilang CoC samtang laing 427 sa Sangguniang Kabataan (SK) chairman ug 2,024 sab sa SK kagawad.

Nisumada ngadto sa 2,451 ang magpapili sa SK nga posisyon ug laing 4,603 sab alang sa posisyon sa barangay. Ang datos gikan sa 337 ka mga barangay sa probinsiya.

Si Atty. Maria Febes Barlaan, provincial election supervisor, nagkanayon nga dako ang ilang pagtuo nga madugangan pa ang ihap sa mga kandidato sanglit alas 11:59 karong gabii mao na ang katapusang oras sa pag-sumite sa mga COC.

Naghangyo ang Comelec nga di paabton sa mga politiko og gabii ang ilang pagduso og CoC aron di magkapuliki pag-atiman kanila ang ilang buhatan.

Pormal sab nga magsugod ang kampanya ugmang adlaw nga matapos sa Oktubre 23.

Gihangyo ni Barlaan ang mga kandidato nga motabang sa pagpatuman sa kahapsay'g kalinaw aron di masamok ang eleksiyon.

"Dapat sila mismo ang magpapatupad sa peaceful elections," tin-aw niya.

"Magpa-deploy tayo ng pwersa ng pulisya at military sa mga magugulong lugar para mapanatili ang mapayapang eleksyon," dason ni Barlaan.

18 ka mga barangay sa Davao del Sur ang bantayan sa kapulisan ug militar human giingong init ang kampanya sa maong mga lugar.

Nihangyo sab ang Comelec ngadto sa mga dagkong politiko nga di mag-apil-apil sanglit usa ka non-partisan ang piliay sa barangay.

Nakaabot sa kasayuran sa Superbalita nga nagpahimutang og ilang mga kandidato ang pipila ka mayor sa probinsiya, wa pay labot ang mga suportadong kandidato sa mga dagkong politiko.

Bisan ang mga kabatan-onan nga magpapili sa SK nga posisyon gihulagway nga nakat-on na sab sa hugaw nga politika gumikan sa impluwensya sa mga mayor nga nagpaluyo kanila. (Orlando B. Dinoy)