TROPA gikan sa 3rd Special Forces Battalion sa Phillipine Army gipakatap sa kabarangayan sa siyudad sa Tagum aron mobantay ug manalipod sa katawhan alang sa nagsingabot nga Barangay ug Sanguniang Kabataan election sa Oktubre 25.
Sumala pa ni 1LT. Marlilo Bersabe, civic military officer sa 3rd SF Battalion nga ang pagpakatap sa tropa sa kasundalohan lakip sa Peace and Order Development Program sa armadong kusog sa nasud sa matag barangay.
Gitin-aw niya nga mga sundalo dili makiggubat sa matag barangay kung dili motabang sa pagsiguro sa kalinaw ug pagpanalipod sa mga proyekto alang sa kalamboan.
Siyam matud pa ka sundalo sa 23 ka mga barangay sa siyudad sa Tagum ang gipakatap aron tabangan ang kapulisan sa pagbantay sa palibot batok mga sakop sa rebeldeng New People's Army ug mga kriminal ilabina na sa nagsingabot nga eleksiyon.
Motabang sab ang kasundaluhan aron magpabiling malinawon ang eleksiyon sa siyudad sa Tagum.
Niadtong miaging adlaw usa ka courtesy call ang gihimo sa lokal nga kagamhanan sa siyudad sa Tagum ngadto sa mga sundalo ug mga opisyal sa barangay aron hisgutan ang mga pagpangandam alang sa piliay.
Samtang didto sab sa lungsod sa Kapalong, 50 ka mga sundalo ang gi-deploy sa kabaranggayan ug 60 sab didto sa lungsod sa Asuncion. (Marvin Pineda)