DIGOS CITY, Davao del Sur -- Gikan sa Hunyo 14 ngadto sa Hunyo 19 didto siya sa Metro Manila kay mitambong sa tigom sa mga abogado ug nakigtagbo sa mga kongresista nga kauban sa iyang anak.
Mao kini ang giklaro ni Davao del Sur Governor Douglas Ra Cagas kinsa gipasanginlan nga maoy 'utok' sa pagpatay sa kanhi peryodista nga si Nestor Bedolido sa gabii niadtong Hunyo 19, 2010.
Gihinabi sa telepono, si Gov. Cagas nagbutyag nga miadto siya sa Manila niadtong Hunyo 14 aron pagtambong sa komperensiya sa mga abogado hangtud sa Hunyo 19.
Sumala niya nga nakigtagbo usab siya sa mga kongresista didto kinsa makasulti nga didto siya sa kongreso niadtong Hunyo 19.
Ang gobernador nagbutyag nga nagbatun siya og sertipikasyon nga magmatuod niini ug kun di pa kini paigo duna siya'y kopya sa iyang plane ticket aron pagpakita nga wa siya'y kalabutan sa pasangil nga murder batok kaniya sa mikompisal nga nagpatay nga si Voltaire Mirafuentes.
Sa iyang affidavit, si Mirafuentes nagpahayag nga sila si Gobernador Cagas ug Mayor sa lungsod sa Matanao Butch Fernandez nalambigit sa pagpatay kang Bedolido.
Miangkon nga siya ang nagpatay, si Mirafuentes nagpahayag nga gisultihan siya nila ni Cagas ug Fernandez sa pagpatay kang Bedolido pinaagi sa pagpatuo niya nga ang biktima adunay kalabutan sa kamatayon sa iyang mga ginikanan niadtong 2009.
Siya miperma og affidavit sa Criminal Investigation and Detection Group (CIDG) headquarters sa Camp Crame sa siyudad sa Quezon niadtong Oktubre 8.
Sumala ni Mirafuentes sa iyang affidavit nga gipatawag siya ni Cagas ug gipaadto sa bay niini sa siyudad sa Digos sa buntag niadtong Hunyo 19.
Dugang niya nga sa iyang paghiabot sa maong lugar iyang nakita si Mayor
Fernandez kauban sa gobernador.
Gipasanginlan niya nga ang duha ka mga politiko nga nagpahibawo kaniya nga si Bedolido mao ang "hinungdan sa kamatayon " sa iyang mga ginikanan, kinsa gipusil patay nila ni Apolinario "Jun" Gamayot Jr. ug Elizardo "Doydoy" Bacon.
Sila si Gamayot ug Bacon gikatahong mga bodyguard ni Fernandez, apan giklaro sab sa mayor nga iyang gipapahawa ang duha human nadiskobrihi nga sila mga "deep penetration agents" sa kaatbang ni Cagas sa politika -- ang mga Bautista sa Malita.
Si Mirafuentes nagbutyag nga ang iyang mga ginikanan, sila si Henry ug Brenda, kanhi nagtrabho kang Cagas isip "mga miyembro sa iyang confidential close-in staff." Sila napatay sa usa ka ambus sa New Visayas sa Matanao niadtong Septyembre 9, 2009.
Apan si Cagas niadtong Lunes nagtin-aw nga wa siya makaila sa magtiayong Mirafuntes ug di sab sila iyang confidential staff.
"(Cagas and Fernandez) were able to convince and mislead me to believe that my parents were killed because of the doings of Bedolido," tug-an ni Mirafuentes sa iyang affidavit.
Tungod niini, ang duha ka mga politiko gipasanginlan nga nagsulti kang Mirafuentes nga ipanimalus ang gipatay niyang mga ginikanan pinaagi sa pagpatay kang Bedolido.
Si Cagas gipasanginlan nga mipasalig ni Mirafuentes nga tabangan siya sa iyang pagpangita og hustisya ug dugang gipasangil sa gobernador nga siya ang kahibawo sa pulis nga lagmit mogukod ni Mirafuentes.
Gitug-an ni Mirafuentes nga gihatagan siya ni Cagas ug Fernandez og .45 kalibri nga pistola ug laing pistola alang sa iyang manghud, Henry Mirafuentes Jr., kinsa magsilbi nga 'lookout' ug drayber sa 'getaway motorcycle'.
Sa gabii niadtong Hunyo 19, si Mirafuentes nagpahayag nga iyang gipusil ug napatay si Bedolido sa Torecs videoke bar sa Quezon Avenue sa dakbayan sa Digos. Matud niya nga siya gibuligan sa iyang igsuon nga si Henry ug laing duha nga usa ka Bado ug Ali.
"That the next day, I was just surprised to learn from some concerned individuals and relatives that allegedly, papers and feelers showing the cartographic sketch of the supposed face of the suspect of the shooting were distributed and circulated on some areas in Digos City. According to them, the cartographic sketch resembles my face. Worse, they said the suspect was described in the feelers as one named 'Ritchie Mirafuentes' and nicknamed 'Boyet'. That on or about the third day since the incident, the said cartographic sketch was shown on the television. Immediately thereafter, I went into hiding," sumala ni Mirafuentes sa iyang affidavit.
Hinuon, si Cagas nangutana nganong gidangtan og dugay nga panahon una si Mirafuentes migawas ug namasangil. Ang gobernador nagbutyag usab nga siya natahap nga pipila sa iyang kaatbang sa politika maoy nagpaluyo sa "gitumo-tumo nga sumbong" batok kaniya.
Nasuta nga si Mirafuentes nagpagawas usab og 'extrajudicial confression' ngadto sa CIDG sa Camp Crame niadtong Oktubre 6 ug nagpadayag sa iyang tinguha nga magpalista sa Witness Protection Program sa Department of Justice.