USA ka patay nga batang lalaki nga gisulod sa plastik napalgan sa daplin sa dalan niadtong Lunes.

Naukay ang katawhan human nahibalo nga may usa ka patay nga bata nga gilabay gahapon mga alas 7:45 sa buntag didto sa Corrales Extension, Puntod, ning siyudad sa Cagayan de Oro.

Si PO3 Camaloding Macmac, sa Police Station 5 (PS5) sa Macabalan, nga nahinabi sa Sun.Star Superbalita nibutyag nga dili na fetus ang ilang nakita atol sa ilang pagresponde kun dili usa na ka bata nga gituohang bag-o pang gihimugso sa inahan.

Kini human namatikdan nga duna nay buhok ug kumpleto na ang hitsura niini.

Ang mga residente sa dapit nakamatikod sa dili maayo nga baho hinungdan nga gisusi ang plastik nga mibabag sa dalan.

Giputos og lampin ang bata una gisulod sa plastik ug gibutang lamang daplin sa dalan, diin ordinaryong basura lamang kini kung tan-awon.

Si Kapitan Marvin Beja sa Barangay Puntod mohimo usab sa pagsusi kung kinsa sa ilang dapit ang bag-ong nagmabdos human ang midwife sa dapit nagtuo nga gikan pa gi-anak ang bata ug patay kini daan.

Gibutyag sa kapolisan nga bisan man kung patay na dihang gianak ang bata, dako gihapon ang tulubagon sa inahan human gilabay lamang kini ug wala gihatagan og saktong lubnganan.

"Ang mahitabo man gud kining uban mga ginikanan dili na magpa-prenatal kay gasto ug magdritso na lamang sa mga mananabang," butyag sa usa ka midwife.

Sa inisyal nga imbestigasyon sa kapolisan dili pa masuta kung pila pa ka bulan o adlaw ang bata labi na kasamtangan pa nga gihimo ang otopsiya niini. Naa karon ang bata sa Bollozos funeral parlor.

Padayon pa usab ang pagsuway sa pag-ila sa inahan sa bata, kinsa pasaka-an ug kasong infanticide sa panahon nga kini masikop. (Stephanie V. Berganio)