Mikulit og kasaysayan ang Philippine women’s national football team human niini gipakaging ang co-host New Zealand, 1-0, sa Group A match sa FIFA World Cup ning Martes, Hulyo 25, 2023 (PH time) sa Wellington, New Zealand.
Si Sarina Bolden maoy nakamugna sa bugtong goal sa duwa sa ika-24 minutos nga maoy nakapakurat sa mga dumadapig sa New Zealand.
Ang New Zealand maoy kanunay nag-ataki sa nag-unang 20 ka mga minutos ug tataw ang ilang pagsalig nga mao kini ang labing unang higayon nga makalusot sila sa group stage.
Ning mga higayuna, sulod sa lima ka mga higayon nga nakasuway pagmugna og goal ang New Zealand apan nabaraw.
Human sa free kick, namugna ang kumosyon sa goalmouth sa New New Zealand ug nakahigayon si Sara Eggesvik pagpatid sa bola paingon ngadto ni Bolden, kinsa niadtong higayuna naa sa duol sa goal sa New Zealand.
Atubangan sa tulo ka New Zealand defenders, nilayat og kusog si Bolden ug gigamit niya ang iyang ulo aron pagmugma sa makasaysayon ug labing unang puntos sa Pilipinas ning maong prestihiyusong kompetisyon.
Dili man tuod grabe ka daghan apan nakahimo gihapon og langas ang abiba sa mga dumadapig sa Filipinas sulod sa venue.
Human sa goal sa Pilipinas, mas niagresibo ang New Zealand sa tinguha nga makatabla.
Sa 2nd half, adunay pipila ka mga higayon nga diriyot naka-goal ang New Zealand apan nabaraw kini sa Filipinas hangtod nahuman ang duwa.
Sa labing unang higayon sulod sa unom nila ka duwa sa World Cup, ang New Zealand nikombati isip grabe ka inilog.
Apan sa wala damha, gipakaging sila sa Filipinas nga ning higayuna pa lang naka-qualify sa World Cup. (AP)