NAGKADUOL na si Michael “Bruce Lee” Domingo (40-14-2, 18KOs) sa ALA stable sa iyang pangandoy nga makapanuktok alang sa lehitimong world title.

Ning bag-uhay lang, ang ALA Promotions ug Branco Sports Promotions nagpinirmahay na og kontrata aron iparang si Domingo kang Vusi Malinga (19-3-1, 12KOs) alang sa International Boxing Federation (IBF) bantamweight eliminator bout.

Ang away ipahigayon karong Oktubre 30 sa South Africa. Ang modaog ning sangkaa mao ang mamahimong IBF mandatory challenger.

Sa sayo, nakatakda untang makig-away si Domingo kang Indonesian Angky Angkota sa Dubai apan dihang miabot ang tanyag sa kampo ni Malinga, wala gyud kini palabya sa ALA Promotions.

Sa kasamtangan, si Domingo maoy no.6 contender sunod nila ni Abner Mares sa Mexico (No. 5), Sasha Bakhtine sa Russian Federation (No. 4) ug ALA stablemate AJ Banal (No.3).

Basi sa iyang rekord, usa gyud ka lehitimong knockout artist si Malinga hinungdan nga angayan gyung magmatngon si Domingo.

Taodtaod na sab gyud si Domingo nga nangandoy nga mahatagan og dakong oportunidad nga sama niini.

Karon nga nagkaduol na gyud siya sa iyang pangandoy, gitawtaw ni Domingo nga mas madasigon siyang nag-ensayo.

Tinguha gyud niya nga mahimong world champion aron makahatag og dakong dungog sa nasod. Ning puntoha, giingon nga hinog na gyud si Domingo aron moaway sa world title.

Si Domingo gikatakdang molarga paingon sa South Africa karong Oktubre 24 diin kauban niya sila si ALA Gym Chief Trainer Edito Villamor, Assistant Trainer John Rey Bunao ug ALA Promotions Public Relations Head Chad Canares.