GIDAKOP sa kapulisan sa Mandaue City Police Office (MCPO) ang usa ka babaye nga gituohang nipadala og mga babayeng menor paingon sa Iloilo City nga gituohang gamiton sa illegal nga panginabuhi, drugas man o prostitusyon.
Ang kapulisan sa Mandaue daling nakig-alayon sa Maritime police sa dakbayan sa Iloilo human sila makadawat og reklamo sa mga ginikanan mao nga ilang na-intercept ang usa ka babaye nga nagdala ingon man ang duha ka mga menor.
Ang ang kapulisan sa Mandaue nakadawat og reklamo sa usa ka inahan nga ang iyang anak wa na mopauli sa ilang balay ug gidala sa usa ka ginganlan og Emily Flores Fernandez, 43, minyo, taga sityo Sta. Cruz, Brgy. Guizo.
Mga sakop sa Investigation Detective Management Branch (IDMB) sa MCPO pinangulohan ni Insp. Mae Ann Florenosos nisikop kang Fernandez niadtong Lunes sa gabii sa iyang balay ug gitanggong na karon sa Station-1.
Samtang sa imbestigasyon, iyang gipahibawo nga igo lang siyang gipadad-an og kuwarta sa usa ka tawo sa Iloilo ug igo lang siyang mopadala sa mga bata sa lugar.
Samtang usa ka ginganlan og Mitch maoy nikuyog sa mga bata sakay sa usa ka barko.
Ang kapulisan sa Mandaue daling nakig-alayon sa Maritime police nga nagbase sa
Iloilo.
Kagahapon sa buntag ilang na-hold ang duha ka mga bata nga nagpangidaron pa lang og 15 ingon man 17 anyos uban sa laing hamtong nga babaye.
Si Senior Supt. Noel Gillamac, pangulo sa MCPO, nibutyag nga nakig-alayon na sila sa International Justice Mission aron maoy motabang sa mga bata ug sa kaso unya nga ilang ipasaka batok sa mga suspek.
Sa pagkakaron, ang kapulisan sa Mandaue nagtuon kon unsa nga kaso ang ilang ipasaka batok sa mga dinakpan.
Matod ni Gillamac nga gawas sa pagpatrabaho sa mga bata sa usa ka KTV Bar didto sa Iloilo, nakadawat silag report nga gamiton usab kini sa pagpayuhot sa illegal nga drugas.
Gani di kini maoy unang higayon nga nakadawat silag report nga adunay mga bata nga taga dakbayan sa Mandaue nga napadala sa dakbayan sa Iloilo.
Samtang usa sa nakahatag nilag kasayuran mao ang usa ka bata nga giingong nakaeskapo didto sa Iloilo city ug nakapauli sa dakbayan sa Mandaue.