GIDABDABAN sa mga armadong grupo ang usa ka tulunghaan sa alas 7:00 sa gabii niadtong Martes didto sa probinsiya sa Maguindanao.

Sigun sa taho gikan sa Maguindanao Police Provincial Office, nga gisulod sa mga armadong lalaki ang Limbayan Elementary School sa Barangay Limbayan, Bongo Island, Parang sa maong probinsiya.

Gibubuan og gasolina sa mga suspetsado ang tulunghaan unya gisindihan hinungdan nga misilaob gilayon ang dakong kalayo.

Dali sab nga misibat ang mga armado sa diha nga ilang namatikdan nga nagsingabot ang puwersa sa militar ug mga sakop sa Citizen Armed Forces Geographical Unit.

Walay nahimo ang mga molupyo sa pagkasunog sa eskwelahan gumikan kay sila nanagan paingon sa luwas nga dapit sa kahadlok sa mga armado.

Nagtuo si Barangay Chairman Adnar Biruar nga dunay bulok-politika ang motibo sa pag-atake sa mga armado nga gituohang alipores sa iyang mga kaatbang sa maong dapit.

Gitahasan na ni Parang Mayor Ibrahim Ibay ang kapulisan nga tutukan pag-ayo ang hitabo aron nga masyran ang tinuod nga motibo sa pagsunog sa Limbayan Elementary School. (Edgardo Fuerzas)