PATAY ang usa ka babaye human naligsan niadtong Miyerkules sa hapon sa usa ka 10-wheeler truck sa Bugo, Dakbayan sa Cagayan de Oro.
Ang biktima, nga gi-ilang si Silveria Ortiz, nabuak ang ulo human naligsan sa sakyanan nga gimaneho ni Ariel Yano, hinungdan sa daling kamatayon niini.
Sa pakighinabi sa Sun.Star Superbalita sa kapolisan sa Puerto, gibutyag nga posibleng pasakaan sa kasong reckless imprudence resulting to homicide ang drayber sa truck.
Matod sa drayber nga nagtuo siya nga tinuyo sa biktima nga magpaligis tungod kay sa layo pa, nabantayan na niini ang biktima apan giingong misuong kini ngadto sa iyang gimaneho nga sakyanan ug wa na makalikay ang drayber, dugang pa niini nga maayo gani hinay lang ang iyang pagpadagan niadtong higayona.
Apan saysay sa bana sa biktima nga si Norberto nga imposible nga magpakamatay ang iyang asawa tungod kay wala man kini nasayran nga problema ug posible nga nasuyop ang iyang asawa sa maong sakyanan.
Nagtuo usab ang igsoon sa biktima nga posible nga nagduha-duha usab sa pagtabok ang biktima kinsa magkuha unta sa resulta sa X-ray niini.
Ang patay nga lawas sa biktima anaa sa punerarya sa maong dapit samtang ang suspetsado anaa sa kustodiya sa kapolisan sa PS6 ug nagpaabot sa tukmang kaso nga ipahamtang batok kaniya.