USA ka wa mailhing babaye namatay human nabanggaan sa usa ka boom truck sa dihang mitabok sa dalan didto sa Purok 8, Barangay Poblacion, lungsod sa Nabunturan, Comval Province, Martes sa buntag.

Sa report gikan sa Comval Province Police Provincial Office nasayran nga pasado alas 10:30 sa buntag, usa ka boom truck nga dunay plate number MOU-124 ug gidrayban sa usa ka Mnalio Carrasco taga Purok Ilang-ilang, Barangay Poblacion, lungsod sa Maragusan nagdagan gikan sa lungsod sa Maragusan padulong sa siyudad sa Davao ug sa pag-abot sa Purok 8, kalit lamang nga nabanggaan ang biktima nga mitabok sa dalan.

Nahiagum og grabing pangos ug bun-og sa kalawasan ang biktima ug daling gidala sa Nabunturan Doctor's Hospital.

Apan wa na kalahutay ang biktima ug nakutluan sa iyang kinabuhi samtang giatiman sa mga doktor.

Ang drayber sa truck mitahan sa iyang kaugalingon ngadto sa mga otoridad.

Kapulisan sa lungsod sa Nabunturan mihimo na og dugang imbestigasyon aron sa pag-ila sa biktima.

Ang kasong reckless imprudence resulting to homicide gihikay sa kapulisan batok sa drayber. (Marvin Pineda)