HUGOT nga giklaro nila ni Davao del Sur Governor Douglas Cagas ug Matanao Mayor Vicente Fernandez nga dili sila maoy utok sa pagpatay sa sakop sa media nga si Nestor Bedolido niadtong Hunyo 19.

Si Cagas nagkanayon nga wa siya makaila sa suspek ug bisan sa mga ginikanan niini.

Subay sa niguwang taho, gibutyag ni Voltaire Mirafuentes, mikompisal nga gun man, pinaagi sa usa ka affidavit nga iyang gipermahan didto sa Criminal Investigation and Detection Group (CIDG) sa Manila, nga si Cagas ug Fernandez maoy nagsugo kaniya aron patyon si Bedolido.

Si Mirafuentes gikustudiya sa Camp Crame human mitahan didto sa dakbayan sa Digos.

"I don't know this Voltaire Mirafuentes and I was even in Manila during the time he was killed", sumala ni Cagas kinsa nagkapuliki karon og depensa sa iyang kaugalingon human gilambigit sa krimen.

Bisan ang pamilya Bedolido nakurat sab nga nigawas ang pangalan ni Cagas ug Fernandez.

Si Bedolido kanhi editor sa Davao del Sur Times Week, usa ka newsletter sa Provincial Government ilawom sa administrasyon ni Cagas.

Nibiya ang kanhi mamahayag sa kampo sa mga Cagas ug unang nibalhin ni Mayor Arsenio Latasa ug ang wa nagdugay niadto sa kampo ni kanhi 2nd Representative Claude Bautista, kinsa niatbang ug naparot ni Cagas niadtong May 2010 election.

Nahimo sab siya nga consultant sa mantalaang Kastigador, usa ka sinimanang tabloid.

Gipatay si Bedolido, human sa eleksyon, sa kanto sa dalang Quezon ug Rizal Avenue.

Si Mirafeuntes, sa iyang affidavit, nagkanayon nga iyang gipatay si Bedolido human siya gipatuo ni Cagas ug Fernandez nga ang mamahayag maoy nagpapatay sa iyang ginikanan.

Sila si Henry ug Brenda, gihulagway ni Mirafuentes nga kanhi nagtrabaho kang Cagas isip "miyembro sa iyang confidential close-in staff." Sila namatay sa ambus didto sa New Visayas, lungsod sa Matanao niadtong Septyembre 9, 2009.

Matod ni Cagas sa pakighinabi sa Sun.Star Superbalita sa telepono, nanaghap siyang gipaluyuhan og pulitika ang isyo kay sumala niya mas nauna pa og pagawas ang media sa balita bisan wa pa siya nakadawat sa affidavit ug summon. Sumala ni Cagas nga wa sab siya makaila sa mga ginikanan ni Mirafuentes.

"Mayroong mga taong gustong ipakulong ako dahil nanalo na ako," dason ni Cagas.

Si Mayor Fernandez susama og pagtuo ni Cagas, ug nagsulti nga “politically motivated” ang paglambigit kanila sa krimen.

Naglaum na lamang ang pamilya Bedolido nga mas mapadali ang pag-resolbar sa kaso aron mahatagan na og hustisya ang gipatay nga sakop sa media. (Orlando B. Dinoy)