Uwahing nakit-an si Flores nga nakig-inom kang alyas Amay Bangay sa tindahan ni Walter Gemina.

Si Gemina, kinsa giapil sa imbestigasyon sa Digos City Police Office, nagsulti nga mibiya siya sa tindahan samtang nag-inom ang suspek ug ang biktima.

Apan sa iyang pagbalik, mao na lang ang iyang nakita nga naligo na sa kaugalingong dugo ang biktima ug wa nay kinabuhi.

Wala na makita ang iyang kainom nga si Bangay mao nga dako ang pagtuo sa mga otoridad nga siya ang mihimo sa krimen.

Gituohan nga nagtago-tago na sa kalasangan sa maong dapit ang suspek ug gipangita na sa kapulisan.

Ang resulta sa otopsiya nga migawas kagahapon sa buntag nagpakita nga nakahiagum og daghang samad dinunggaban ang lawas sa biktima.

Gihan-ay na sa DCPO ang pagduso sa tukmang kaso batok sa suspek.

Sa laing bahin, ang kapulisan sa lungsod sa Hagonoy, Davao del Sur nakasikop sa suspek sa kasong paglapas sa R.A. 8353 kon anti-rape law of 1997.

Si Senior Police Officer 2 Edwin Mancera Lasquite sa plans and operation/warrant subpoena, kuyog nila ni SPO1 Raul Dela Cuadra, mao ang nagbitbit sa warrant of arrest padong sa balay ni Geneton Rojo, 52, minyo, ug lumolupyo sa Purok 2, Barangay San Guillermo, Hagonoy.

Gidoket ang suspek sa criminal case number 299 (2010) sa Regional Trial Court (RTC) Branch 19 nga giluwatan ni Judge Carmelita Sarno-Davin sa siyudad sa Digos.

Way gitugot nga piyansa alang suspek mao nga nag-antos na kini sa kabugnaw sa selda sa kapulisan samtang pagabistahon sa hukmanan ang iyang kaso. (Dondon Dinoy)