DUHA ka mga batan-ong lalaki ang sunod-sunod nga gipatay sa wa mailhing mga tawo sa managlahing insidente kagahapon sa kaadlawon dinhi sa siyudad sa Davao.

Mga biktima mao sila Leonil Señoron, alyas Oning, 18, tricycle driver ug nagpuyo sa Fr. Selga Street, Bankerohan ug Archelou Savillana, alyas Otoy, 15, out-of-school youth ug nagpuyo sa Savina, Barangay Bucana, ning siyudad.

Base sa imbestigasyon ni Police Officer 3 Sherwin Arbania sa San Pedro Police Station, ang unang biktima gidunggab sa ala 1:05 sa kaadlawon didto sa Father Selga.

Si Arbania nagbutyag nga ang biktima giluba sa tulo ka mga tawo samtang natulog sud sa jeep nga dunay plate number LWA-466.

Mga nakasaksi nagbutyag nga nagsakay og motorsiklo ang mga mamumuno dihang miabot sa nahimutangan sa biktima ug wa naglangan og panahon mikanaog ang duha dayon gidunggab ang biktima.

Si Señoron gidala sa Davao Doctors Hospital (DDH) apan tungod sa kadaghan sa iyang mga samad nga naangkon gideklara sa mga doktor nga patay dihang miabot sa tambalanan.

Ala 1:35 sa kaadlawon gidunggab sab sa wa mailhing mamumuno si Savillana samtang nagtindog lamang kilid sa kapilya diin gihimo ang disco party didto sa Purok 9, Bucana.

Si Savillana nakaangkon og daghang mga samad sa kalawasan dihang gihansakan og hait nga kutsilyo ang biktima sa duha ka mga tawo.

Ang biktima daling gidala didto sa Southern Philippines Medical Center (SPMC) aron patambalan apan gideklara sa mga doktor nga patay na siya.

Mga otoridad natahap nga atraso ang motibo sa mga tawo nga mipatay sa mga biktima mao nga ilang paningkamotan nga mailhan, masikop ug mapasakaan og kaso ngadto sa korte.

Niadtong miaging adlaw, si Mayor Sara Duterte naghanyag nga mohatag og P15,000 nga incentive sa matag lima ka mga kasong murder nga masulbad sa pulis.

Kini maoy gianunsiyo sa mayor atol sa iyang State of the City Address (Soca) aron madasig ang mga pulis sa paghimo sa ilang trabaho.

Ilawom sa kategorya sa Crimes Against Persons, ilawom sa Index Crimes, makasulbad sa kasong murder ug homicide dunay madawat ang pulis nga P15,000 matag lima ka mga kaso nga masulbad.

Makasulbad og lima ka mga kasong rape dunay madawat nga P5,000 samtang makasulbad sa mga kasong physical injuries dunay madawat nga P1,000 kada lima ka kaso nga masulbad.

Sa Crime Against Property, makasulbad sa lima ka mga kaso sama sa robbery, theft, carnapping, ug cattle rustling dunay madawat nga P3,000.

Ilawom sa Non-Index Crimes, makasulbad og lima ka mga sakong pagpayuhot og druga dunay ganti nga P5,000; samtang sa lima ka mga kasong paghupot og druga nga masulbad dunay P3,000.

"(This) will only address the resolution rate but it will not address crime incident. Kani siya human na man nahitabo ang crime so naa pay aspect nga dapat wala pa nahitabo ang crime ma-prevent na nato (In this perspective we are rewarding the response after a crime has been committed but there's another aspect which is before a crime is committed) Crime prevention is another project and program na tagaan ug emphasis (which we will give emphasis)" suma ni Duterte sa gihimong press conference niadtong Lunes. (Alger Dura/JCZ)