PUWEDE kaayo sa Amerika ang abilidad ug kapabilidad sa higanteng si Junmar Fajardo, kinsa bag-uhay lang nituboy sa University of Cebu (UC) Webmasters ngadto sa makasaysayong titulo sa Cebu Schools Athletic Foundation Inc. (Cesafi) seniors division.
Nagkanayon si Webmasters coach Rhoel Gomez nga mismong si Alaska Aces coach Tim Cone ang niyagyag ning maong obserbasyon dihang nagkaestorya sila ning bag-uhay lang.
Gipasabot ni Gomez nga iyang gipadad-an ang kanhi naggiya kaniya dihang nagduwa pa siya sa Alaska og video tape sa usa sa mga duwa sa Cebu Schools Athletic Foundation Inc. (Cesafi) finals series diin gipakgang sa Webmasters ang siyam ka mga tuig nga dominasyon sa University of the Visayas (UV) Green Lancers, 3-1.
“Sige na gyud nakadungog si coach Tim sa pangalan ni Fajardo pero wala pa siya nakakita ani nga niduwa. Katong iya nang nakit-an sa video, nibilib gyud siya. Ingon siya nga puwede kaayo si Fajardo nga moapil og training camp sa US,” matod ni Gomez.
“Kon mag-training camp ni si Abay (angga ni Fajardo) sa US, basin dili na ni makabalik dinhi. Wala man gyud niingon si coach Tim nga puwede ni siya sa NBA pero wala ta makahibalo kay makalihok man gyud siya bisan sa iyang gitas-on.”
Gitataw ni Gomez nga giimbitar ni Cone nga paapilon sa praktis sa Alaska ang 21 anyos ug lumad nga taga Pinamungajan, Cebu hasta ang dakong pointguard sa Webmasters nga si Bryan Heruela.
“Excited gyud kaayo si coach Tim nga motan-aw ni Fajardo pero mananghid pa ko ni Atty. (Baldomero Estenzo) ani. Gusto sab siya motan-aw ni Heruela,” batbat ni Gomez.
Sa laing bahin, giklaro ni Eztenzo, team manager sa Webmasters, nga abli na kaayo ang pultahan alang sa pagsulod ni Fajardo sa PBA sa sunod tuig.
Giklaro ni Estenzo nga matuman na ang iyang gipangandoy kang Fajardo nga mao ang makahuman kini sa pagtungha unya ang nakanindot kay gibinlan pa gyud sa 6’10” nga magduduwa og korona ang UC.
“Dili man ang championship ang akong gihuwat, ang graduation man ni Fajardo. Mo-graduate na man siya karong tuiga, so puwede na kaayo siya mag-PBA next year,” pasabot ni Estenzo.
Giklaro ni Estenzo nga malipayon gyud siya kang Fajardo kay gawas nga makahuman na kini sa pagtungha, nahashasan na sab gyud og insakto ang abilidad niini alang sa mas dagkong liga nga sagubangon niini sa ugma damlag.
Gitino ni Gomez nga wala ug tuo gyud ang tanyag nga nadawat ni Fajardo diin lakip sa grabe gyud og interes nga gipakita mao ang teams sa Liga Pilipinas nga mao ang M.Lhuillier Kwarta Padala-Cebu Niños, Mandaue Landmasters, ug ang team ni pound-for-pound boxing champion Manny Pacquiao nga mao ang MP GenSan Warriors.
“Daghan gyud kaayo ang offers. Naa gani ni-offer og house and lot unya sakyanan pa gyud. Mogukod gyud sila ni Fajardo bisan pareha pa og suweldo sa PBA,” pasabot ni Gomez.