NING pormal nga pagpatong sa unang adlaw sa kampanya alang sa naghinangat nga piniliay sa Barangay ug sa Sangguniang Kabataan, mga saad ug panumpa maoy ipadungog ngadto sa mabuot nga magbuboto sugod karong adlawa.

Mga kandidato nga adunay managsamang tumong ug tuyo mopadungog ug mopalanog na usab kon unsa ang ilang gitagana nga kaayohan ugma damlag sa ilang matag barangay.

Dunay mga kandidatong magpasubli nga mapasigarbuhon mopanghambog ug mobansiwag sa mga proyekto nga ilang nahimo sa niaging serbisyo.

Apan di kalikayan nga aduna usay pipila ka mga incumbent barangay officials nga magpasubli bisan pa man og naigo sa kontrobersiya o kaha way nahimo sa ilang paglingkod sa pangatungdanan.

Mga nagkadaiyang paagi sa pagkonbinse sa magbubuto maoy gihimo karong lig-ong hinagiban uban sa pangindahay nga sila tuohan.

Pangatubang sa katawhan, mga posters ug streamers nga gipabantang sa kadalanan, tagawtaw sa kahanginan ug uban pang gimik aron lang paghatag og igong katagbawan nga makapasabot ug makapasalig sa kinabag-an.

Apan sa katapusan, ang kinailadman nga pagbati sa kinabag-an ra gihapon sa mga magbubuto maoy mohukom kinsa ang angayan sa maong puwesto.

Sila ang modesider, sila ang adunay dakong katungod, ug dayan na lang nga respetuhan ang ilang makab-ot nga hukom.

Hinaot pa unta nga di dasdason ug di hasulon sa mga bayolenting hitabo ang adlaw sa kampanya ug sa piniliay ug ingon man dawaton ang kapildihan ug malinawon nga hangupon ang kadaugan human sa eleksiyon.