Doy M. Abellana
Cebu City
“UY, BART! Maayo kay nakatultol ug nahiduaw ka ning buntaga sa akong payag nga nag-umbaw ngadto sa kinapusoran sa siyudad!”
“Bitaw, Lo Ernie. Natultolan ko gayud ang imong hideout. Nagpangutana kos kabalayan sa ubos ning bungtod nga imong gipuy-an bahin nimo. Ilado man kaayo kas imong mga silingan sa kinaubsan. Aw, syempre, sikat god kang writer, Lo. Gusto unta kong mokiskis sa imong tangil… ngano nga sa edad mo karon nga 80, abtik ug tuyhad pa gihapon ang imong linaktan? Unya, milahutay gihapon sa natad sa panulat. Di parehas nako nga nag 30 pa gain mihunong na sa panulat.”
“Bart, sa sama nimong batan-on ug ulitawo pa nga magsusulat, ayaw gyud paghunong sa tugahala mo sa panulat. Alang nako, magtubo man akong edad, magpabilin nga batan-on ang akong kasingkasing. Kini ang hinungdan nga abtik pa ako sa pagkakaron. Gani, dinhi sa natad sa akong payag maka push up pa kog kabayente matag buntag.”
“Mao nga bilib gyud ko nimo, Lo Ernie. Daghan nang writer karon nga nahanaw na ang ngalan sa sirkulasyon sa mga tabloid ug magasing binisaya. Mga edaran ug batan-ong writer nga sama nako nanghunong na sa panulat. Dili parehas nimo nga milahutay gyud hangtod karon ug nangharos pa sa pagpanaog sa mga tigi sa sinulatay. Mao nga gusto kong makakiskis sa imong dagon, Lo. Nganong way paghupas ang tinta sa imong dagang sa natad sa panulat?”
“Tungod sa akong inspirasyon karon sa panulat, Bart. Usa ka sweet sixteen…!”
“Sweet sixteen? Ngiga god nimo, Lo! Menor de edad man. Madala pa diay sa imong tuhod, Lo Ernie?”
“Siya ang akong inspirasyon pagkakaron, ngano nga milahutay kos akong panulat, Bart. Siya ang han-ukanan kos akong mga pagtuaw ug imahinasyon. Gani, anaa siya karon sa itaas sa akong payag, Bart. Gusto kang motan-aw niya?”
“H-Ha? Ngiga gyud diay nimo, Lo, uy! Diin man nimo siya ma-pik-ap? Sa Junquera?”
“Sa P. del Rosario, eskina Don Pedro Cui Street…”
“Sus, duol ra gyud diay sa dalan Junquera!”
“Ang sweet sixteen kong inspirasyon, Bart, maoy naghatag kanakog enerhiya sa natad sa panulat. Tana sa itaas aron makita mo siya.”
“H-Ha? Lawgawa nimo, Lo Ernie, uy! Kana diay?”
“Oo, Bart! Ang Sun.Star Superbalita maoy bugtong kong inspirasyon sa
pagkakaron sa akong paglahutay sa panulat.”
“Sakto gyud ka, Lo! Sweet sixteen na man diay karon ang Superbalita!”
“Oo, Bart! Nagsaulog sa iyang ika-16 nga kasumaran karon ang Sun.Star Superbalita, ug sa sama natong mga writer, angay kining himuong inspirasyon alang sa atong paglahutay sa panulat hangtod sa kahangturan!” (KATAPUSAN)