LIBOAN ang mga kandidato dinhi sa dakbayan sa Sugbo alang sa barangay ug Sangguniang Kabataan elections karong Oktubre 25 nga nakaduso na sa ilang certificate of candidacy sa buhatan sa Cebu City Commision on Elections (Comelec).

Nasuta sa Comelec nga daghan ang mga kandidato kon ang gidaghanon lang sa mga barangay ug mga posisyon

nga pagailugan.

Sa Cebu City north district nga gidumala ni Atty. Marchel Sarno, sa pagsuwat niining balita, niabot na sa 92 ka mga kandidato pagkakapitan ang nakaduso sa ilang COC.

Samtang duna say 925 ka mga kandidato pagka barangay konsehal, 108 sa pagka SK chairman ug 713 pagka SK councilor.

Samtang sa Cebu City south district ni Atty. Edwin Cadungog, niabot na sa 80 ka mga kandidato pagka kapitan, 701 pagka barangay konsehal, 83 pagka SK chairman ug 506 ang modagan pagka SK councilor.

Sa kinatibuk-an, adunay 172 ang magpapili sa pagka kapitan, 1,626 magpapili sa pagka barangay konsehal, 191 sa pagka SK chairman ug 1219 ang modagan pagka SK councilor.

Ang dakbayan sa Sugbo adunay 80 ka mga barangay, diin 46 ang nahimutang sa north district ug 34 ang naa usab sa south district.

Apan namatikdan sa Comelec nga daghan kaayo ang magpapili sanglit adunay lamay 640 ka mga elective position sa barangay ug susama gihapon ang gidaghanon sa SK.

Si Gemma Sta.Rosa sa Comelec south district nagkanayon nga gamay na lang ang ilang gipaabot nga mosang-at sa ilang COC hangtod sa alas 12 sa tungang gabii sanglit daghan na man ang naka file niadtong Oktubre 8 ug 10 nga mga petsa nga ilang gituohan nga makahatag kanila og suwerte.

Gipadayag usab ni Ren-ren Villegas, secretarya ni Sarno nga di na kaayo daghan ang ilang gipaabot nga mosumiter sa ilang COC sanglit kasagaran sa mga kandidato nakaduso na man.

Gidugang ni Villegas nga kagabii adunay barangay nga mobutang og banda diha sa atubangan sa buhatan sa Comelec alang sa pagsugat sa alas 12:00 sa tungang gabii diin magsugod na usab ang kampanya alang sa eleksyon.

Samtang sa sayo pa, giawahag ni Mayor Mike Rama ang mga kandidato sa paglikay sa pag-away.

Mao kini ang iyang kanunay nga isulti sa mga kandidato nga nag-courtesy call sa iyang buhatan agig pangayo sa iyang bendisyon ug suporta sa umaabot nga eleksyon.

Siya niingon nga di angay nga magkandidato kon mag-way lang tungod sa pulitika. (PAC)