GIHAGIT ni Sr. Supt. Erson Digal, director sa kapulisan sa lalawigan sa Sugbo, si Kapitan Marianito Yaon, sa Brgy. Antipolo, Medellin nga mosang-at og kaso batok sa duha ka mga pulis sa Medellin kinsa gipasanginlan niini nga nang-extort niyag kwarta.
Kining hagit ni Digal kang Yaon iyang giluwatan human pasanginli sila si PO3 Catalino Russel ug PO2 Rodello Pilapil Jr. nga wa siya dakpa niadtong miaging semana kay iyang gihatagan og kuwarta human kini mangayo kaniya bugti sa iyang kagawasan.
Si Digal niingon nga tataw nga pagdaot lang sa mga sakop sa Medellin Police Station ang gihimo ni Yaon sanglit gitinuod kini sa kapulisan nga sikupon apan nakaipsot nila ni PO3 Russel.
Giklaro ni Digal nga hangtod way kaso nga iduso si Yaon batok sa iyang mag sakop, di sila moimbestigar niini.
Gibutyag ni Digal nga niadtong Oktubre 1 ning buwana niduso sa iyang certificate of candidacy (COC) si Yaon sa buhatan sa Commission on Elections (Comelec) dihang dunay ni-text kanila sa iyang presensya.
Daling niadto ang mga pulis aron dakpon si Yaon sanglit dunay warrant sa kasong illegal possession of firearm ingon man illegal nga drugas.
Dunay blotter ang kapulisan sa Medellin nga nakaipsot si Yaon dihang sikupon na unta nila ni Russel sanglit nakalugnot ug ang t-shirt niini maoy nagisi ug nadala sa police station.
Una niini si Yaon nadakpan sa kapulisan sa dakbayan sa Sugbo niadtong Martes sa udto dihang mosuyop unta kinig shabu diha sa Ponce Compound sa Brgy. Carreta ning dakbayan sa Sugbu.
Nipasangil si Yaon nga planted ang tanang mga ebedensya ug usa ka opisyal sa Medellin maoy iyang gipasanginlan nga nagpaluyo sa kalbaryo nga iyang giatubang karon.
Dugang ni Digal nga nabutang sa watchlist Yaon sa kapulisan sa lalawigan ug tunog na kaayo ang ngalan niini nga tigpamaligyag shabu sukwahi sa pangangkon niini nga wa mag-apil-apil sa illegal nga kalihukan.