KAILA ni PO3 Osorio Ramiso Jr. ang usa sa mga suspetsadong tulisan kay iya kining kauban diha sud sa compound sa ilang boarding house nga mao say nahimutangan sa gitulis nga lending firm niadtong Lunes sa gabii.
Apan wa gyud magdahom si Ramiso nga tulisan diay si Nuez samtang ang suspek wa sab makahibawo nga pulis diay siya.
Ang duha di hinuon managhigala bisan kon naa ra sila puyo sa usa ka compound.
Nagpasalamat ra sab hinuon si Ramiso nga way bisan usa nila ka kauban, apil na si Nuez, nga nakahibawo nga siya pulis.
Kay kon kon nakahibawo pa ang suspek, nagtuo siyang dunay moposte kaniya aron masanta kon siya mosuway sa pagtabang sa mga staff sa Pulis Kabit-Bisig lending firm sa Brgy. Sambag 1, dakbayan sa Sugbo.
Siya niingon, sa phone interview sa Sun.Star Superbalita, nga dunay panahon nga magkasugat sila ni Nuez gikan siya sa trabaho diha sa Police Regional Office (PRO-7).
Gibutyag niya nga dunay panahon nga si Nuez malipayon kaayong makig-inom sa iyang mga higala nga kanunay moduaw kaniya sa boarding house.
Wa hinuon mahitabo nga giagda siyag inom niini.
Wa gyud siya magtuo nga kauban diay kini sa mga tulisan nga sila si Alberto Torregoza ug Shyrell Ostia hinungdan nga nakurat gyud siya human nasikop ang duha ka mga kauban niini nga iyang napusilan.
Gibutyag usab niya nga nakulbaan gyud siya atoll sa ilang pagpinusilay dihang ningsukol sila si nisukol sila si Torregoza ug Ostias tungod kay sukadsukad sa iyang
pagka-pulis, una pa kadtong higayon nga nakasuway siyag pinusilay.
“Kabado ko gamay una pa gyud to nako nga nakasugat og pinusilay gawas lang sa training. Kay sa pagpasalba nako sa warning shot, diretso man sila nakog pusil. Mi-cover ko dayon bawos. Wala ko magtuo maigo pero dili mi lagyo,” asoy pa ni PO3 Ramiso.
Apan bisan pa man niini, nabalaka na siya karon sa iyang seguridad ingon man sa iyang pamilya ug duha ka mga anak hinungdan nga nagtinguha siya nga mobalhin og pinuy-anan ug di mokumpiyansa.
Gibutyag niya nga niadtong 1997 nasulod siya pagka-pulis, nadistino sa Narcotics Command (Narcom) apan dihang na dissolve kini, automatic siyang na-absorbed sa Philippine Drugs Enforcement Agency (PDEA-7) niadtong 2002-03 ug nibalhin sa Police Community Relations (PCR) sa PRO-7 niadtong 2007.
Dugang niya nga sa mga gun proficiency test permaninte siyang pasado bisan di kaayo dako ang points.
Samtang hatagan siya og pasidungog sa Police Regional Office (PRO-7).
Si Sr. Supt. Anthony Obenza, hepe sa PCR-7 nga nahinabi sa Sun.Star Superbalita, nagkanayon nga ila nang gihikay ang special award alang kang Ramiso nga irekumendar ngadto sa buhatan ni Chief Supt. Ager Ontog Jr., director sa PRO-7.
Matod ni Obenza nga nagpaabot na lang sila sa report sa insidente gikan sa Cebu City Police Office (CCPO) alang na sa dinaliang paghikay sanglit mo-agi pa kini sa Special and Awards Board sa PRO-7.
Gipadayag niya nga Medalya ng Kagalingan ang labing taas nga mahatag nga pasidungog sa PRO-7 kang Ramiso, apan si Ontog makahimo sa pagrekumendar ngadto sa Campo Crame nga mahatagan kinig spot promotion.
Si Obenza niingon nga gikalipay nila sa PCR ang gihimo ni Ramiso sanglit di sila makatuo nga sa kahilumon niini duna diay kiniy gitaguang kaisog sa pag-atubang sa kakuyaw bisan off-duty.
Dugang niini nga kugihan nga pagka-pulis si Ramiso. Gani maghilom-hilom lang kini nga magtrabaho diha sa opisina sa PCR ingon man mokatawa lang kon komedyahan ug kanunay nga motambong sa ilang mga kalihukan.
Subay niini, si Supt. Paul Labra II, deputy city director for operation sa (CCPO),nagkanayon nga wa nila isalikway ang posibilidad nga dako ang grupo hinungdan nga ni-coordinate sila sa Bohol Provincial Police Office (BPPO).
Matod pa ni Labra nga dako ang grupo ug dunay mga record nga pagpanulis didto sa Bohol, diin aktibo ang tulo nga nadakpan nga mga sakop Casimero ‘Meloy” Garcia robbery group.
Sa impormasyon nga ilang nakuha, si Torregoza nabutang sa wanted list sa Bohol tungod sa mga dagkong krimin nga gikalambigitan niini, samtang ang tinuod nga ngan ni Nuez mao si Joel Torregoza Nuel ug di John.
Ang mga tulisan ubos sa obserbasyon sa mga doctor ug ila karong gisiguro ang seguridad niini diha sa tambalanan aron di gyud makasibat.