MIKABAT sa 914 ka mga kandidato ang magpapili alang sa barangay ug Sangguniang Kabataan eleksiyon sa Oktubre 25, 2010 sa dakbayan sa Tagum.

Sumala pa ni Jim Casinto, election officer sa Comelec sa siyudad sa Tagum nga sa pagtak-op sa pagdawat nila og mga certificate of candidacy (COC) niadtong Oktubre 13 miabot sa maong gidaghanon ang mga kandidatong nagpapili.

Sa maong ihap sulod sa 23 ka barangay sa siyudad sa Tagum, 46 niini magpapili isip pagka-barangay kapitan, 468 pagka-barangay kagawad, 77 pagka-SK chairman ug 323 pagka-SK kagawad.

Sumala ni Casinto nga mas midugok ang mga nag-file og COC sa unang semana sa dihang gisugdan kini.

Matud ni Casinto nga sa pagkakaron padayon ang ilang pag-finalize sa mga listahan sa mga kandidato nga modagan aron maandam na alang sa eleksiyon.

"Sa pagkakaron padayon mi sa pag-finalize sa listahan sa mga opisyal nga modagan," sulti ni Casinto sa paghinabi sa Superbalita.

Kagahapon sa hapon, milagda sab og peace covenant ang mga kandidato nga gilangkuban sa kapulisan ug Comelec alang sa malinawong piliay.

Human niini, gihimo sab sa Comelec ang briefing ngadto sa tanang mga kandidato bahin sa angay ug dili nila angay buhaton panahon sa pagkampanya hangtud nga mahuman ang piliay.

Lakip sa mga gipahimangno sa mga kandidato mao ang pag-ila sa mga common poster area, election fraud ug ang pagsumiter sa mga kandidato sa ilang nagasto human sa eleksiyon.

Gidugang sab ni Casinto nga nagmuntar sab sila og mga bulletin board sa matag barangay hall aron masayod ang mga kandidato asa sila mahimong mamutang sa ilang mga campaign materials.

Malaumon sab si Casinto nga mamahimong hapsay ug magmalinawon ang umaabot nga piliay sa siyudad sa Tagum.

Duha sab ka mga barangay ang gitutukan sa mga otoridad sa dakbayan tungod sa init nga politika. (Marvin Pineda)