Laing 16 anyos gilugos

NAGPATABANG sa kapolisan ang 16 anyos uban sa iyang amahan human giingong gilugos sa paryente ra usab niini sa Barangay 26 ning siyudad sa Cagayan de Oro.

Si Police Officer 1 Marichu dela Calzada sa Police Station 3 (PS3) sa Agora nibutyag sa Sun.Star Superbalita nga niadtong Oktubre 9, 2010 personal nga nagpatabang sa ilang buhatan ang 16 anyos nga dalagita uban sa iyang amahan ug niasoy sa pagpanglugos nga nahitabo kaniya.

Unang gitug-an sa dalagita ang insidente sa iyang amahan hinungdan sa kasuko niini ug deretsong nagpatabang sa PS3.

Tungod sa maong taho giimbitahan sa kapolisan Joseph Arcallez sa susamang dapit aron pangayoan og mga pamahayag.

Matud ni Dela Calzada nga gibuhian gihapon kini ug giklarong wala gisikop apan usa sa gitumbok nga suspetsado.

Kasamtangan gihapon nga giimbestigahan ang kaso sa Women’s and Children Protection Desk (WCPD) sa PS3.

Gipahigayon pa usab og medical examination ang biktima aron masuta kung positibong gilugos. (SVB)