SAMTANG kusog ta kaayo mosaway ug mokementaryo sa mga pulis nga nakahimo og mga hiwing binuhatan ug buluyagon, angay lamang, tukma ug maoy labing matarong nga ato usab nga dayegon ug bubu-an sa pahalipay ang mga pulis nga nagtinarong sa serbisyo ug naghimo og maayong binuhatan labi na gyod ang pagpakgang sa mga kriminal nga makapadayon sa ilanag yawan-ong katuyuan.
Gilabhan og maayo sa media si PO2 Rodelo Pilapil Jr., kinsa naghubo sulod sa barko pa-ingon sa Isabel, Leyte niadtong miaging semana gumikan sa kahubog. Morag si Tarzan lagi. Nagbitbit pa sa iyang armas de fuego bisan kon gun ban gumikan sa eleksiyon.
Mirisi ra nga gipasakaan og kaso. Kamo gani mga pulis kon moinom mo, ibutang sa tiyan, dili sa ulo aron di mo magmaoy.
PASIDUNGGAN
Angayan lang nga hatagan og pasidungog kini si PO3 Osorio Ramiso nga sakop sa Police Community Relations sa Regional Police Office (PRO 7) kinsa nakapusil sa duha ka tulisan nga mitulis sa usa ka lending firm diha sa Sambag Uno niadtong Lunes sa gabii. Tayming lang nga diha magpuyo si Ramiso ug bisan off duty siya, miresponde. Nakigpinusilay sa mga tulisan. Naigo niya ang duha ug nadakpan ang usa.
Ang maong mga tulisan mga galamay diay sa banggi-itang Meloy Garcia Robbery Group nga gilangkuban sa mga Bol-anon. Unya kini si Ramiso taga Bohol sab diay ni. Mao ni gi-ingon nga ‘ninja ray mopatay ninjo’. Puwede man gani ni siya i-rekomendar og spot promotion. Pero taas-taas pa na nga proseso. Commendation ug award, okey na usa.
RAKET
Gipahunong na ni S/Supt. Erson Digal, provincial director, ang raket ug panguwarta sa pipila ka presento sa kapulisan sa kalungsuran ug mga component cities kabahin aning pag-isyo og police clearance. Nasuta nga adunay pribadong kompaniya nga nagmuntar og computer sa matag police station nga mangulekta sa molukat og police clearance.
Ang proseso unta sa pagkuha og police clearance mao nga ang aplikante adto mobayad sa city/municipal treasurer’s office. Human siya mobayad, iyang ipakita ang resibo ngadto sa pulis. Ug dili na mangulekta ang pulis. Apan sa police station, dunay computer sa usa ka private firm ug makuha og litrato ug hulagway sa aplikante nga mangayo og dugang bayad nga dako pa sa opisyal nga gibayad sa tresurero. Puwede ang aplikante magdala og iyang kaugalingong litrato. Apan adto gyod pakuha-on sa pulis sa computer. Pila kahay cut sa pulis ani no?
(bgnalzaro@gmanetwork.com)