BAG-O pa gani nahuman ang national ug local elections, masugba na sab ang mga botante sa barangay ug Sangguniang Kabataan elections.
Samtang nag-angat pa ang kampanya, duna nay gipangtumbok nga mga barangay nga hotspots ning umaabot nga eleksyon sa Oktubre 25.
Sa eleksyon importante kaayo ang pagbaton og kabugnaw sa buot, inay ipatigbabaw ang kainit tungod kay di hinuon mapresentar og maayo ang plataporma. Bati nga mga isyu hinuon ang sumsoman.
Bisan ang personal nga mga isyu sa matag kandidato kaykayon, utingkayon og maayo aron iladlad sa iyang mga kaatbang.
Mao nang ang pulitika di alang sa mga tawo nga sibuyason og panit kay segurado gyung manghilam-os kini sa kauwaw kon kini mahitabo. Way bukog nga di mogawas gikan sa aparador basta lang magamit sa kontra.
Kon buot baya huna-hunaon, managsilingan ug kabanay ra gyud ning sagad nanagan sa barangay. Hapit kada adlaw magkatagbo ra sa karsada, apan tungod sa kainit sa pulitika, nakalimtan ang relasyon.
Magdinautay ug magmugnaay na hinuon og mga isyu.
Yuna, unsa man gyud diay ang tumong sa pagpapili og posisyon, di ba ang pagserbisyo?
Unta ang ideal ug husto mao ang pagpresentar sa plataporma sa iyang pangagamhanan kay dinhi makita unsay matang sa pagdumala ang matagamtaman sa barangay.
Di baya tunaan sa kabaw ang barangay hall nga yama-yamaan lang. Sagrado kini nga dapit kay maoy sabakan sa pangagamhanan sa labing batakan nga institusyon sa kagamhanan.
Diha sa barangay magsukad ug magsugod ang pagserbisyo sa publiko. Busa mas maayong pilion ang kandidato nga dunay direksyon, di ang mga libakero ug libakera. Kay kon silay naa na sa poder, wa gyud na silay mahimo.