LALAKENG nag-angkas sa motorsiklo napatay sa usa ka pulis nga lakip sa nagdumala sa checkpoint human kini giingong unang namusil kanila sa miaging gabii sa Brgy. Maricaban, lungsod sa Santa Fe, Isla sa Bantayan.
Si Insp. Jaime Tolentino, hepe sa kapulisan sa Sta. Fe Police Station nga nahinabi sa Sun.Star Superbalita, niila sa namatay nga si Edgard Jumola, 35, taga Sitio Matiamban, Brgy. Ocoy sa nahisgutang lungsud, kinsa dead-on-arrival sa Bantayan District Hospital.
Si Tolentino nagkanayon nga mga alas 8:00 pasado niadtong Miyerkules sa gabii nipahigayon silag checkpoint uban sa walo niya ka mga sakop ubos sa koordinasyon kang Comelec election officer Maria Neriza Gigante subay sa nagsingabot nga barangay ug Sangguniang Kabataan (SK) elections.
alit lang niabot ang usa ka motorsiklo kolor puwa (plate no. OV-7850) nga gimaniho ni Jesus Montebon Tuñacao, 38, nagpuyo sa nahisgutang lugar uban sa angkas nga si Jumola.
Apan dihang nabantayan nila ang checkpoint sa mga pulis, si Jumola kalit lang nibunot sa iyang gidala nga .357 caliber revolver ug gipusil si PO3 Juanito Yunting.
Wa maigo si Yunting kay daling nakahupo ug nakabawos gilayon sa pagpusil hinungdan nga naigo sa iyang dughan si Jumola.
Gidali sa pagdala sa mga pulis si Jumola ngadto sa Bantayan District Hospital apan way swerte, gideklarar siya ni Dr. Lee Fua nga dead-on-arrival tungod sa fatal nga igo sa dughan gikan sa kalibre .45 nga pistola ni Yunting.
Matod pa ni Tolentino, kinsa didto sa hitabo kay nagdumala, nga lihitimo ang gihimo sa iyang sakop sanglit namiligro ang kinabuhi niini dihang gikalitag pusil ni Jumola.
“Kon wala pa masipyat, hayan pulis unta ang hayaon. Maayo na lang gani kay gi-swerte si PO3 Yunting ug ang suspek maoy napatay,” sumala pa ni Tolentino.
Ila karong gisusi ang usa ka warrant of arrest nga two counts sa attempted murder nga giisyu ni Judge Antonio Marigomen sa RTC Bogo niadtong Oktubre 25, 2004 sanglit ang ngalan nga nakabutang usa ka John Paul Jumola, “alias Noynoy”.
Susihon usab nila ang report nga ilang nakuha nga si Jumola nalambit sa nagkadaiyang mga krimin sa ilang lungsod sa Sta. Fe.
Si Montebon gitanggong usab sa Sta. Fe Police Station, kay nakuhaan usab og 4 inches nga kutsilyo dihang nasikop uban sa suspek.
Si Sr. Supt. Erson Digal, director sa kapulisan sa lalawigan sa Sugbo nga nahinabi sa Sun.Star Superbalita ug dySS Super Radyo, niingon nga iya nang gimanduan si Tolentino nga ipaubos sa sa camp restriction si Yunting samtang nagpadayon pa ang imbestigasyon.
Dugang ni Digal nga ang armas ni PO3 Yunting ingon man ang armas ni Jumola gidala na sa PNP-Crime Laboratory-7 dinhi sa dakbayan saSugbo kagahapong adlawa alang sa usa ka
ballistics examination.
Giklaro niya nga lihitimo ang gihimo ni Yunting kinsa igo lang nidepensa sa iyang kaugalingon dihang giunhan sa pagpusil.
Warning niya ngadto sa mga criminal nga kon di sila mohunong sa ilang tinunto diha sa Probinsya paghimog mga dautang laraw, gukdon sila sa ka kapulisan.
Si Yunting sa iyang bahin niingon nga wa siyay tuyo nga patyon si Jumola, kon di self-defense ang iyang gihimo sanglit hapit gyud siya maigo sa iyang ulo atol sa pagpamusil. Andam hinuon niyang atubangon ang imbestigasyon sa maong kaso.
Na-recover sa crime scene ang armas ni Jumola uban sa upat ka mga bala, kalibre .45 ni Yunting uban sa unom ka mga bala ug usa ka kabhang niini.