USA ka hamtong ug lain duha ka mga minor de edad ang grabeng naangol sa pagbusikad sa bomba sa alas 2:00 sa kaadlawon niadtong Oktubre 15, didto sa siyudad sa Cotabato.

Mga biktima mao sila si Kagi Hamsa Oranon, 61, minyo ug duha ka mga menor de edad nga sila Lalai ug Bai Shy, ug mga molupyo sa dalang Macapagal sa maong siyudad.

Subay sa taho sa Cotabato City Police Office nga gibutang sa wala mailhing mga suspetsado ang wala pa matino nga improvised explosive device (IED) sa entrance gate sa balay ni Datu Haron Oranon, midagan pagka-kapitan sa North Upi, Maguindanao.

Tungod sa kakusog sa pagbusikad, naguba ang pader ug mituasik ang mga shrapnels ngadto sa balay sa biktima hinungdan sa ilang pagka-angol.

Dali nga gisapupo ang mga samaron sa ilang mga miyembro sa pamilya ug gidala sa Cotabato Regional and Medical Center.

Hangtud karon blangko pa ang mga otoridad sa mga tawo nga dunay kalabutan sa pagpamomba sa bay ni Oranon. (Edgardo Fuerzas)