GIHINGUSGAN pag-ayo sa administrasyon ni Mayor Michael Rama ang paglimpyo ug paghawan sa nagkalandrakas nga sitwasyon sa tanang kamerkadohan sa dakbayan sa Sugbo. Gipademolis ang tanang mga barong-barong ug mga extension sa stalls. Maayo ning ilang gibuhat kay hilabihan ka tigmi ug hugaw na ang mga merkado kay anha naman magpuyo ang mga namaligyaay. Dunay taho nga anha mangatulog ang mga manag-uyab, gihimong tagayanan sa kalipay kay maayo nalang kay sa maghanig og unas sa kasagingan o karton sa kasagbutan.
* * *
Daghan ang nakulban sa panginabuhi kay dili naman sila makaladlad og baligya sulod ug gawas sa merkado. Gihinginlan sila og ang nahibilin mao nalang kadtong nag-abang og puwesto o stalls. Dili na pakatulgan panahon sa kagabhion, kinahanglan mopauli sa ilang pinuy-anan human sa pagpaninda sa tibuok adlaw. Maayo kining gibuhat sa City Hall kay gikinahanglan man gyod nga limpyo ang merkado. Dinhi gud paliton ang pagkaon sa mga konsumidor sama sa karne, isda, utanon ug mga lagutmon. Manghinaot ta nga magpadayon ang pagdisiplina sa mga tinugyanan ug wala untay gipihig bisag kinsay matumban.
HULGA
Apan dunay nagsagubang og hulga sa ilang panginabuhi bisan duna silay puwesto sa merkado. Dunay lakang karon nga papahawaon ang mga negusyanteg buwad sa Taboan Public Market kay dili sila botante sa siyudad sa Sugbo. Pastilan ning politika no? Mapagan ang panginabuhi. Dugtong ni sa politikanhong panagbangi tali sa Kapitolyo ug sa City Hall. Kahinumdoman, ang mga tinderag isda sa Pasil ug sa Carbon nga dili taga dakbayan sa Sugbo gihinginlan ni kani Mayor Tomas Osmeña. Malagmit ang hayop nga gikan sa probinsya did-an nga anha ihawon sa Cebu City Modern Abbatoir.
* * *
Kon dunay taga-lalawigan sa Sugbo nga naninda sa mga merkado ning siyudad, duna man usab taga-siyudad nga nagpuyo sa yuta sa lalawigan sa Sugbo. Kanang mga okupante diay ubos sa Provincial Ordinance 93-1. Kinahanglan ang patas nga tratamento ug dili maayo ang pagpatunhay sa kagaw sa diskriminasyon kay ang taga-lalawigan ug taga-dakbayan sa Sugbo managsama ra og pagbati kay kitang tanan mga Sugbuanon.
CHICHARON
Kamo bay atakihon, lalim ba. Mao nga patuyangan nato si Bokal Arleigh Sitoy sa iyang gibati. Nahibalo god siya nga dili mosalir ang iyang balaodnon kay dili man ang tanan parehas og huna-huna. Kalami sa chicharon, daghan man gani nga na-highblood kay wala salini sa maong kinaham nga pagkaon nga ginama sa Carcar. Akong tan-aw, walay molampos sa iyang lakang nga butangan og warning ang pagkaon sa chicharon, lainon ang kasilyas sa mga bayot ug tomboy, mananghid sa asawa kon mamalit ang bana og tambal nga makapagana. Paukyab lang ni, sa manok pa milabok og maayo si bokal Sitoy sa ruydahan sa hunta probinsiyal apan igo lang mikapa-kapa kay napildi sa sultada. Malagmit sa sunod mopalabang siya og ordinansa nga pabuhian ang napulo ka mga makasasala bugti sa nakonbikto nga usa ka inosente.
(csa_1156@yahoo.com; cell #: 0905-250-4643)