ANG sugilanon ni Leonardo Quiapo mahitungod sa pagpangligid sa bato niadtong Martes sa hapon didto sa Barangay Sudlon 1 angayan nga seryusuhon sa taga Disaster Coordinating Council sa Cebu City Hall. Matod ni Leonardo nga sa dihang nakadungog siya og dahunog wa siya magtuo nga mga dagkong bato ang nangligid gikan sa bukid padung ngadto sa iyang nahimutangan sa ubos. Ang duha ka dagkong bato miguba sa karsada una kini molayat padung sa ubos. Maayo nalang gani kay nasangit kini sa punoan sa mangga kay kung wa pa dretso ni sa usa ka panimay. Ang gidak-on sa bato igo gyud nga makapulbos sa maong balay.

20 MINUTOS

Pero ang sugilanon ni Kapitan Dante Tabucal maoy nakapakugang nako. Matod niya 20 minutos ra ang deperensya sa dihang miagi siya sa naligdan sa bato. Sa ato pa kong nadelatar pa siya og 20 minutos siguradong napusa siya uban sa gimaneho niya nga motorsiklo. Ang taga city hall daling mipadala sa ilang mga heavy equipment aron ipadaplin kadtong usa ka dakong bato nga miali sa karsada. Apan duna pay daghang dagkong bato sa itaas nga nakapabalaka ni Kapitan Tabucal. Iyang plano karon nga ilang sak-on ang nahimutangan sa bato ug pangitaan og paagi nga di na kini maligid padung sa ubos. Ang akong sugyot iapil sab tong naa daplin sa karsada Kap kay dilikado man gihapon kini nga maligid.

ISYU

Puwerting inita ang unang adlaw sa pangampanya alang sa piniliay sa barangay ug SK. Grabing sinabligay og lapok ang mga kandidato. Ang akong awhag sa mga botante palihug ayaw mo padala sa lansis o diskarte sa mga kandidato. Duhira og maayo ang ilang pagkatawo  ug ang ilang plataporma. Kinahanglan nga di gyud ka masayop ilabi na sa mga kandidato nga commission ray naa sa ilang hunahuna. Mga kandidato nga inpluwensya og panguwarta ray tumong ug tuyo ug nagtakuban nga kono andam moserbisyo sa katawhan.

PANAWAGAN

Nanawagan ko sa mga sakop sa Nadela Clan. Usa ka tuig na ang nakalabay sukad nga napahigayon nato ang unang paglimpyo sa Can-asujan sa Carcar City. Ang report nga akong nadawat midaghan naman sab ang mga gapnod sa palibot sa dam, mao nga ato na sab ni nga estoryahan uban sa taga National Irrigation Administration alang sa sunod natong pagpanglimpyo. Si Agaw Rudy Nadela nga dako kaayo og natabang sa una natong pagpanglimpyo sama sa naandan maoy atong tahasan pagpadangat ning maong mensahi sa atong kaparentihan diha sa Liboron ug sa iyang mga kauban sa Irrigators Association.