SALUDO kita niining gihimo ni Cebu City Mayor Mike Rama nga mao ang pagpanglimpiyo sa mga kamerkadohan sa dakbayan.

Taodtaod na kining naobserbahan sa kadaghanan nga gawas sa kahugaw ug nagpasad nga mga sagbot nga gipasagdan na lang sa mga hingtungdan, gihimo na lang usab kining pinuy-anan sa pipila ka mga nagpantalya nga kunohay naninda.

Tungod niini, gusto sa mayor nga wa nay tugotan nga makatulog sa merkado, ug kadto na lang gyung mga lehitimo nga nanag-abang ang hatagan og puwesto aron gayud matuman ang kahapsay ug ang kalimpiyo. Kon kini perming hugot nga ipatuman, ato na unyang makita sa unahan ang kaanindot ug kahapsay na unya sa nga merkado nga kon imong lantawon dili na sa mangumprahay sa peligro.

Pero ambot og makiangayon ba usab kining pagpatuman ni Rama nga kon ikaw dili botante ning dakbayan kinahanglan ikaw palayason sab bisan pa man og nakatuman ka sa mga patakaran.

Yanong kulban sa kaldero ang mga ginikanan kansang tinguha mao lang pagpanginabuhi sa tinarong nga paagi ug pag-edukar sa ilang mga anak sulod na sa hataas nga katuigan.

Unsa may lohiko o saktong pagsabot sa mayor ning iyang mando karon? Tungod lang ba kay usa sila ka probinsiyano nga dili makatampo sa pulitikanhong interest sa dakbayan sa Sugbo maoy hinungdan nga sila silutan?

Unsa may kalahian ning mga kabus nga tigpatigayon nianang mga dagkong negusyanteng nga nanag-iya ug mga building, mga department stores ug uban pa nga dili mga botante sa dakbayan?

Be fair na man mayor, di nato buwagon o sabungon ang mga Sugbaonon, after all, we are all Cebuanos.