KLARO na ang kadaugan sa siyam ka mga kandidato nga magpapili pagka barangay kapitan sa dakbayan sa Sugbo karong Oktubre 25.

Base sa talaan sa Commission on Elections (Comelec) sa Cebu City north district nga gidumala ni Atty. Marchel Sarno, ang mga barangay diin nga nag-inusara ra ang ni file sa ilang certificates of candidacy (CoC) mao ang Barangay Pahina Central, Kalubihan, Budlaan, Tinago Kasambagan ug Sto. Niño.

Sa south district ni Atty. Edwin Cadungog, pulos mga barangay nga gikan sa kabukiran ang way mga kontra sama sa Tagba-o, Sudlon-I ug Pung-ol Sibugay.

Tungod sa maong kalamboan, ang mga kandidato sa pagkakapitan sigurado nang mananaog sa pag-abot sa election.

Apan si Kapitan Pancho Ramirez Sr., sa Barangay Sto.Niño nagkanayon nga bisan pa man kon wa siyay kaatbang karong Oktubre 25, padayon gihapon siyang mangampanya di alang kaniya kon di alang sa iyang mga kauban nga magpapili pagka konsehal.

Si Atty. Marchel Sarno, election officer sa north district, nagkanayon nga ang siyam ka mga kandidato pagka kapitan sa nagkalain-lain nga barangay sa siyudad nagkinahanglan lang og usa ka boto alang sa ilang kadaugan pag-abot sa adlaw sa eleksyon karong Oktobre 25. (PAC)